【Viu】「阿卵」楊偉倫、麥沛東、Jan林海峰同蘇玉華等，噚晚出席電影《正義迴廊》慶功宴，導演何爵天預告如果有2000萬票房，會公開大量被刪片段。阿卵同麥東對於新片成績感鼓舞，笑言最好畀電影上映10年8載，累積更好票房！講到麥東嘅對白：「屈我啦！屈我啦！」熱爆網絡，佢坦言意想不到，阿卵大讚好用，就算打邊爐被屈夾多件肥牛都用得著。
Jan亦指「屈我啦！」做咗潮語，相信拜年時都會聽到大家咁講，又話家人睇咗《正》片後，都讚佢嘅演出「OK啦」，令佢好沾沾呀！阿蘇就話老公潘燦良睇完，同自己傾到凌晨3點，笑認增進埋夫妻感情添呀！
講到Jan繼續戴K字cap帽現身，佢同阿蘇都話唔知K先生真正身份，但感激對方仗義幫忙。Jan仲話希望去埋英國為《正》片謝票，要衝出香港呀！
