【Viu】 草蜢一連4場紅館騷《RE：GRASSHOPPER 草蜢演唱會2022》，眨吓眼噚晚就尾場喇！老友林海峰、伍詠薇同關心妍夫婦再度捧場。而谷德昭、小儀、林德信、鮑起靜等都係座上客。草蜢3子雖然已經係中生，但佢哋嘅舞功真係拍得住班後生，一出埸已連續跳唱8首快歌，氣都唔喘嗰下係勁嘅！全晚草蜢唱咗40幾首歌，真係挑戰人體極限，呢個就係佢哋唔請嘉賓嘅原因，唔係就唔夠時間唱自己啲歌喇喎！ 到Encore尾聲，蔡一傑終於忍唔住爆seed：「其實開場前六點幾我失咗聲，嗱嗱聲打俾我醫生，然後入咗醫院打針，我好驚，驚唱唔到，我真係好驚，多謝我醫生，多謝現場嘅你哋。」向來man爆嘅傑仔都哭了。完騷後傑仔笑言：「我打針張單都未俾錢，醫生好好護士仲好，佢哋叫我快啲去紅館，唔好要歌迷等。」草蜢全晚冇停過嘅表現，歌迷收晒貨啦，但唯獨操到咁fit都唔騷吓肌，小編就有啲失望，傑仔解釋：「鬼叫我哋貪靚咩！想換多啲靚衫。」
