【Viu】由黃子華、潘燦良主演嘅舞台劇《最後禮物》，噚晚終於完成第五十場演出！呢次舞台劇由籌備到公演超過一年時間，臨別一刻大家嘅心情當然會有啲百感交集。開騷前子華神仲喺Facebook，好感性咁寫咗首短詩勉勵大家！今次公演咁圓滿，每一位台前幕後都功不可沒，子華神都話自己每一晚都搏到盡，而阿燦就感觸呢次可能係同子華神最後一次合作。子華神仲好多謝一班台前幕後，話自己今次終於圓夢，可以同當年香港話劇團嘅當家女主角區嘉雯合作，呢番說話搞到嘉雯喊到收唔到聲啊！完成咗呢50場舞台劇，唔好以為子華神同阿燦有得抖啊，嚟緊仲有大把工作等緊佢哋！子華神都要快啲歸隊，為啱啱破4000萬票房嘅新戲《飯戲攻心》繼續落力宣傳，而阿燦就要做導演拍攝新劇《短暫的婚姻》。
