【Viu】早前飛魚方力申曾揚言馮志強導演開拍《I SWIM》電影版，希望自薦魔鬼教練一角，而咁啱今日馮導就孖住關楚耀、Buber麥詠楠去新城電台宣傳新戲《失衡凶間》，咁就要等佢自己講啦！馮導雖然話有得諗，不過佢就有難言之隱：「暫時未可以透露住。」咁講到執導《失衡凶間》嘅單元《唐樓》，馮導對喺戲中飾演怪人嘅Buber就讚不絕口啦！佢話：「我初時都驚佢介意，亦唔多見樣，係靠肢體動作表達，但佢好專業，成身濕晒屈喺個箱都毫無怨言。」Buber笑言演出此角並唔覺得辛苦，反而覺得好玩又有挑戰性，因為唔能夠依靠對白營造恐怖感，而係以肢體同五官去表達。
而演出單元《暗角》嘅關楚耀，喺戲中飾演顏卓靈嘅音樂監製兼情夫，雖然兩人第一次合作，但覺得對方好犀利，其中有幾場戲顏卓靈成功帶自己入戲。
