【Viu】古巨基嘅音樂企劃「I Really Love To Sing」第二炮邀請到MC張天賦合作，合唱版嘅《自我安慰》噚日(6號)正式推出，噚晚基仔同MC喺IG開Live為粉絲解構新歌！MC對於能夠同偶像合作，都覺得成件事勁夢幻，仲非常好奇點解偶像咁多年嚟一啲都冇老到，基仔突然靈機一觸話：「就係娶一個會幫你保養嘅老婆」，MC聽到都忍唔住大笑兼豎起隻手指公！
另外，基仔更透露喺新歌前奏同中段過門加入《記憶棉》旋律其實係佢嘅主意，覺得MC呢首歌都係關於感情嘅失落，再接住《自我安慰》就好似一個治療同解脫咁！而MC亦分享錄音小插曲，話自己錄音當日唔記得帶耳機，就借咗唱片監製舒文舒老闆嘅耳機嚟錄音，覺得聽得好舒服，之後古Sir好好人，喺拍MV當日就送咗呢隻耳機俾佢！呢個偶像真係冇得彈啊！MC仲話下次開騷一定會戴住呢個耳機上台添！而基仔亦代賦二代追問MC嚟緊嘅個人演唱會詳情，不過一提到演唱會，MC又再口窒窒，話咩都唔講得住，但可能到時搵古Sir做嘉賓都唔定添！咦，睇嚟大家可以期待聽到《自我安慰》嘅現場版噃！
