【Viu】小薯茄最近忙住綵排9月10-12號嘅5場麥花臣騷，每天都綵排得如火如荼，佢哋仲搞笑話攰到已經超越如火如荼變成灰燼呀。話晒小薯茄成軍6年，第一次搞咁大壇嘢，啲飛仲係半個鐘內全部售罄，佢哋都話有啲壓力呀。又要排練又要正常出片咁辛苦，見到一個二個都瘦晒啦，好似J哥咁，他為咁個演出仲特登減肥，不過瘦咗被人讚靚仔都係值得嘅！2022先過咗大半年，但今年小薯茄好似撻著咗咁，出騷、出書、出souvenir，又搞商場展覽，勁多搞作，除咗努力經營自己個channel，仲有拍戲拍劇，而麗英又繼續出歌，就算佢自稱賺唔到錢至少買到快樂呀！
