【Viu】Will柯煒林憑住《濁水漂流》木仔一角，獲得第40屆香港電影金像獎《最佳新演員》同《最佳男配角》嘅提名，講到喺《濁》，同兩位前輩謝君豪同吳鎮宇合作，Will就大讚豪哥勁nice，經常喺片場同佢哋講笑，而同鎮宇哥喺綵排試位嗰陣就比較多交流，Will仲話鎮宇哥比較追求即時反應，鍾意拋波俾你，睇你會點接，而佢自己都好enjoy呢種交流方式，事關佢覺得好好玩啊！Will仲話可以再同鎮宇哥碰頭，想問對方覺得佢喺《濁》入面演成點添！
雖然Will做演員呢個目標非常清晰，但曾經佢都因為自己嘅表現而迷惘過，但好彩佢諗起楚原喺金像獎獲頒終身成就獎時，所講嘅致謝詞：「無論你噚日幾風光，亦無論你噚日幾失意，聽日天光嘅時候，你一樣要起身做返一個人，繼續生活落去。」，呢段說話就拯救咗Will，令佢走返出嚟！
而對於自己而家知名度提升，同埋被封男神，Will就相當謙虛，話而家出街其實都冇咩人認得自己，更加唔覺得自己靚仔，仲講笑話自己只係八仙過河嘅鐵拐李，並唔係咩男神，咁幽默得唔得㗎？
