《多啦A夢》入面嘅胖虎（舊譯技安）係一名音痴，但偏偏熱愛唱歌，成日迫大雄、小夫做佢「演唱會」觀眾。最近胖虎踏足樂壇，出咗新歌《巨大的夢想》（ジャイアントドリーム），《多啦A夢》官方更喺6月15日胖虎生日宣布，胖虎將於8月推出個人專輯《胖虎的超級音樂會》（ジャイアンのスーパーリサイタル），以歌手身份正式出道！
胖虎一直有個歌手夢（Photo／dora-world.com）
《巨大的夢想》MV日前已喺Youtube上架，舞台上嘅胖虎落力演出，載歌載舞，透過歌詞鼓勵大家勇敢追夢，「我有一個遠大的夢想，鼓起勇氣，向前邁出一步。如果您有任何顧慮，別擔心，我在這裡！」雖然胖虎歌聲貫徹個人風格，破壞力十足，但勝在夠投入，令聽到嘅人頓時元氣滿滿！
胖虎有一個歌手夢，老友小夫就渴望做時裝設計師，去年其中一集《多啦A夢》動畫就講述小夫創立自家服裝品牌「夫卡潘納」。早前小夫品牌募集觀眾為胖虎設計登台衫，胖虎拍MV著嘅「Big G」T-shirt就係勝出作品（「Big G」為胖虎英文名）。
新歌《巨大的夢想》（Photo／dora-world.com）
唔講唔知，聲演胖虎嘅聲優木村昴，本人歌喉其實非常好。今次新歌就由木村昴填詞、演唱，連MV中胖虎嘅舞步都係依照佢真人動作製成。至於胖虎首張專輯將於8月24日面世，除咗收錄個人作品，仲會有合唱歌，唔知邊個角色有份唱呢？
胖虎8月出碟！（Photo／dora-world.com）
胖虎舞步依照木村昴動作製成（Photo／dora-world.com）
Photo／dora-world.com
