【Viu】樂隊RubberBand（RB）一連三場喺西九文化區竹翠公園舉行「RubberBand x 香港節慶管弦樂團“Live by the Harbour”音樂會」噚晚尾場，當主音6號介紹《逆流之歌》嘅時候，驚覺疑似「火車未到站」，嚇到佢即係擰轉身check：「仲係一條好漢！陰影嚟㗎啫！」
騷後6號再為褲鏈解釋，佢話只係一個距離嘅問題，絕對冇「未到站」嘅情況：「頭場《逆流大叔》導演陳詠燊私訊提我留意褲鏈，就同咗服裝同事講，佢哋幫我油黑咗（條褲鏈），係一個錯覺嚟啫！」續意外爆試過好多次甩褲鏈嘅其實係阿正，阿正笑話啱啱細細聲聽到「未到站」反而係佢最驚，即刻向後檢查，阿偉憶述阿正十幾年前嘅慘痛經歷：「喺酒吧騷好型豎起隻腳彈結他，但出到嚟嘅相係開晒⋯」認真笑爆嘴！
一向鍾情開戶外騷嘅RB，今次同時實現同管弦樂合作呢個夢想，6號話有咗呢次經驗，若然未來再開戶外騷都可以好好咁裝備自己，例如喺體力上，因為始終同開紅館騷係兩回事。另外，講到老婆兼御用填詞人Tim Lui擔任嘉賓，6號話老婆係捱義氣幫手，好感謝對方一叫即到，真係好sweet呀！
