為慶祝出道20周年，張敬軒12月將會舉行跨年紅館騷《The Next 20 Hins Live in Hong Kong》，一共15場演唱會開賣無幾耐就被掃清！準備開騷同時，軒仔推出全新廣東歌《On my way》，呼應返20年前出道作《My Way》。MV噚日已經出爐，故事講述一家人移民要面對嘅掙扎，相信會引起共嗚。
Photo / 大會提供
20年前，軒仔用《My Way》勉勵自己，亦憑著呢首歌同樂迷建立起堅實關係；20年後嘅今日，軒仔回望對自己嘅承諾，以《On my way》嘗試拆解不完美之完美，學識欣賞光華背後嘅遺憾美。
Photo / 大會提供
MV故事講述一家四口將要離開成長地，各人都面對唔同煩惱：媽媽放盤時懊惱他鄉住處，父親要放棄事業，哥哥同女友分手，弟弟嘅同學都逐一離開。離別之際，哥哥帶弟弟重遊南山邨、傳統舊式士多、冬菇亭大排檔等香港地標。返到屋企，媽媽因為壓力大同哥哥爭執，爸爸眼見大家其實唔捨得離開，於是將封好嘅紙箱拆返，決定留低。
軒仔以說書人身份穿插喺整個MV，佢解釋新歌同《My Way》嘅關係：「『困難要用我的堅強和努力勇敢面對』，呢個係《My Way》一直提點自己，但係身處當中，學識勇往直前戰勝艱巨後，又係咪準備好同孤獨、憂慮共存？所以《On my way》當中嘅『I’m good , I’m fine, I’m alright. I still try, I still fight, I’m alive』可以話係一個重生版嘅《My Way》。」
Photo / 大會提供
問到MV邊一幕令佢最感受深刻，軒仔就話：「其實係成個故事去睇去感受，好似作為母親嘅徬徨、父親同事嘅餞行、哥哥捨棄嘅感情、弟弟同學嘅離去，重重嘅情感放埋一齊，先成就到呢首歌想帶出嚟嘅訊息，所以我喜歡嘅係成個故事。」
Photo / 大會提供
Photo / 大會提供
