【A&M Diary】迪士尼樂園除咗係一個浪漫嘅國度，亦係一個大家追尋夢想嘅地方，為延續香港迪士尼樂園15周年嘅慶祝活動，喺城堡外嘅大舞台上演全新戶外音樂派對：迪士尼尋夢奇緣！除咗米奇同米妮等迪士尼朋友之外，仲有首次喺香港迪士尼樂園登場嘅《玩轉極樂園》主角米哥，同大家載歌載舞，所以今個假期同A姐入去迪士尼打卡enjoy尋夢假期啦！
提前預約
提提大家，所有賓客 (包括樂園門票持有人、「奇妙處處通」會員同免費門票持有人) 都要喺到訪樂園前，先喺香港迪士尼入園預約網站預約到訪日期。「奇妙處處通」會員就可以優先喺到訪前8日內預約，而其他賓客就可以喺到訪前 7 日內預約。喺預約過程中，賓客要作出健康聲明。如果有出現發燒或呼吸道感染病徵，於過去 14 日到訪香港以外嘅地方或者密切接觸過新型冠狀病毒病感染確診者，正接受強制檢疫嘅人都唔可以進入樂園。如果預約成功，你將會收到短訊或者電郵確認，去到樂園記住要出示返已經登記嘅門票或者會員卡，就可以入場啦！
迪士尼尋夢奇緣
香港迪士尼樂園15周年嘅壓軸活動，推出全新戶外音樂派對：迪士尼尋夢奇緣！由一班歌手現場演繹原創主題曲「Follow Your Dreams」揭開序幕，並演唱九首迪士尼動畫嘅歌曲，讓我哋陶醉20分鐘嘅音樂世界。
表演當然唔少得米奇老鼠、米妮老鼠、唐老鴨、黛絲同高飛啦，但最驚喜係首次喺香港迪士尼登場嘅《玩轉極樂園》主角米哥，演唱獲得奧斯卡原唱歌曲嘅電影主題曲：「Remember Me」！緊接嘅就係《優獸大都會》嘅歌曲「 Try Everything」，兩首歌都提醒我哋要珍惜喺追夢旅途中，陪伴同鼓勵我哋嘅人。之後仲有勇敢追夢嘅公主寶嘉康蒂、慕安娜、愛莎女王，唔少歌曲都經過重新編曲，帶嚟耳目一新嘅感覺！
Pixar 水花大街派對
睇巡遊絕對係入嚟迪士尼樂園一個好重要嘅節目，嚟到夏天嘅巡遊就加入玩水環節，一齊降吓溫啦！今次嘅Pixar 水花大街派對就加入咗《1⁄2的魔法》兩位主角仁仔同肥巴、《反斗奇兵》 嘅胡迪、牧羊女寶貝同翠絲、《玩轉腦朋友》 嘅阿樂與阿愁、《沖天救兵》嘅卡叔同羅小飛，陣容夠晒新鮮感，真係好有氣氛。
迪士尼酒店 – 手工藝工作坊
如果入住迪士尼樂園嘅酒店，仲可以參加酒店內嘅活動，今日我哋參加嘅手工藝工作坊就回應番迪士尼尋夢奇緣，製作高飛嘅風箏小擺設喇！
迪士尼尋夢奇緣 – 全新餐單
除咗有全新表演可以打卡之外，亦有全新餐單，等你可以用味覺感受「Follow Your Dreams」嘅美食，例如《反斗奇兵》主題蛋糕、《玩轉極樂園》系列曲奇爆谷、愛莎女王皇室盛宴等。
