【now.com娛樂】 TVB年終都有唔少旅行節目，近期興由一位達人帶大家玩樂，之前有杜如風的《九州攻略》，到上星期就播出森美主持的《森美旅行團》。前者大條道理，擺明用港女姿態帶大家遊日，食買玩行街，一係就最貴，一係就最新最得意，純粹追求一份虛榮的滿足感。
至於《森美旅行團》，他是以男神身份，帶住幾位靚女遊山玩水，重點不忘吃喝玩樂，但更重要是一齊去經歷一些事情，從中獲得切身難忘的感受，例如在護城河釣魚，去參與當地的祭祀慶典，又在城中河道撐Stand Up Paddle去Sky Tree，森美還玩到情感大爆發想起老婆，鏡頭前決崩，真的每一幕都在長知識。
兩個旅遊節目，得出結果是，大部分人都在踩杜如風冇文化，一味得個玩字，森美的就有深度有意義得多，然後大讚主持得出色。用口讚容易，但身體力行的又有幾多個？好簡單，問問自己，你出發前是會細讀一本歷史文化書才起行，希望可以邊行邊感受書中所描述的風情，還是去書局買本「閃令令」旅遊書，然後對準書中地址同推介，掃清十大必食小店、七大必掃手信和五大必去熱點。可以肯定，後者的人數會跟俾森美的like數不相伯仲。
其實大家都是口裡說不，身體最誠實，5日行程中有一日玩護城河釣魚是可以的，但冇安排一日去Shopping就勢係假！不喜歡杜如風，可以因為她的主持方式如出一轍，平平的聲線聽得人昏昏欲睡，而且她在東京所做的，跟自己一樣，咁有咩好睇？相反森美的主持是較有趣抵死，而且重點是看似更專業，睇到自己平時看不到的東京，所以要急急俾like。但他日再去東京的話，你準備的行程又會傾向哪一樣？心裡有數吧！
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
