【now.com娛樂】雖然從來都未紅起過，但相信好多90後千禧後都識得邊個係司徒瑞祈。可能因為佢游水好叻，亦可能因為大台捧過佢拍《四葉草2》，但更重要係佢做過幾年兒童節目主持，呢個緊要，因為細路一定記得佢。其實佢個樣都唔算太差，做得運動員，理論上都捱得，大台亦當佢新吳卓羲咁俾足機會，點解都係唔紅？咁要多得08年佢在澳門賭輸錢欠落幾十萬大耳窿，被人淋紅油追債，當年都好轟動，因為睇唔出呢個外表幾乖嘅男仔會咁做。結果演藝事業再起唔返身，網民仲送多個花名，叫「賭徒瑞祈」，其實幾陰功，衰嘢仲要起埋朵真係隨時跟一世。
要搵食，又唔一定要撈呢行嘅，好多藝人都有開舖做生意，特別係飲食業，佢自己都有開過cafe。不過藝人開食肆分兩種，一種係本身撈得好掂，靠名氣再開舖賺多筆，攞個名出嚟就大把人爭住幫佢搞喇；第二種係本身撈得好唔掂，搵唔到食，要破冰轉身轉型搏一鋪，希望靠飲食業搵到第二春。剛剛見到司徒瑞祈離開大台，在慈雲山開小食店賣冬瓜茶同輕食，傳媒都幫得佢好盡，又話佢日做15個鐘（講真自己一腳踢呢個工時都幾基本），又話十號風球都照開舖。咁做人嘅嘢，當然想見人好，都希望佢可以憑呢間舖翻身，不過飲食業真係唔易做，有個人嘅經歷，可能會啟發到佢。
講緊係而家人人叫佢做生煎王子，同江若琳高調拍緊拖嘅蕭潤邦Oscar。Oscar以前都係唱歌嘅，有隊組合叫Bliss，簽俾麥浚龍公司旗下，同吳日言差唔多同期。你記唔記得當年嘅佢吖？唔記得，即是好唔紅囉。佢同司徒瑞祈唔同，Oscar形象唔負面嘅，純粹係慢慢淡出呢個圈。你唔好見佢而家四圍開分店，又有明星做女友，好似好威威，以為係富二代，其實佢離開娛樂圈後捱得好辛苦先有今日。佢首先走到去上海學藝，學整包點，學成返嚟先同朋友夾錢，在旺角開咗間賣生煎包嘅舖，超細間，裡面企到兩三個人左右啦，客人就在舖外立食。客人立食，唔通煎生煎包嗰個有得坐？當時Oscar就在咁嘅環境下開始佢嘅新事業，死捱爛捱，在超窄地方一個人包一個人煎一個人賣，由朝做到晚，唔敢講佢工時幾長，但15個鐘睇怕都唔止。
捱過頭段，生意開始好，成為長龍排隊店，佢依然在旺角呢個小角落拼搏，冇放鬆過，直至賺夠錢租間大啲嘅舖開分店，終於可以俾客人坐低食飯，咁又去到另一階段，要度菜式、請師傅、請人睇舖，全部都係試出嚟，佢講過全部都瀨過好多次嘢，先摸到做飲食業嘅門路。肯搏肯捱加上有啲生意頭腦，去到今時今日大家先見到呢個身光頸靚，坐擁8間分店嘅大老闆（而佢而家每日都仲會周圍巡舖），一切都得來不易，唔靠明星效應，純靠腳踏實地，司徒瑞祈，你都應該參考吓。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
