【now.com娛樂】《逆權司機》在韓國票房走勢強勁，突然傳出南韓前總統全斗煥，有意採取法律行動，指電影中一些鏡頭，包括軍人向市民開槍，乃是捏造。真係豈有此理，點解咁厚面皮嘅人都有？
套戲香港未上，仲未有得睇，但都想講幾句，放心，唔係影評嚟嘅。話說《逆權司機》係真人真事改篇，改篇邊樣真事呢？就係南韓1980年嘅光州事件。當時南韓仲未有民主，全國捲起民主浪潮，四圍都戒緊嚴，手握兵權嘅全斗煥趁機發動政變，同時再加大力度戒嚴。光州係抗爭得最犀利嘅地方，戒嚴下仍然有由大學生同市民組織嘅大規模示威活動，全斗煥於是下令武力鎮壓，有市民用肉身擋坦克，但軍隊依然開槍殺市民，死傷幾千人。係咪好熟面口？係呀，可以理解為韓國嘅六四，不過光州事件同六四嘅結果唔同，光州事件後來成為南韓走入民主嘅導火線之一，而六四呢？你懂的。
繼續講電影，依然係真事，在光州事件準備發生嘅時候，因為戒嚴同封鎖，外界好難知道裡面嘅消息，有個德國記者就想入去採訪，遇著電影主角的士司機。司機本來只係貪車資多而載佢去光州，入到去後見到咁嘅情況，後來一路保護德國記者出入，都係出於公義。台灣個譯名比較有feel，叫《我只是個計程車司機》，即是去到危急關頭，雖然我只係一個的士司機，但我都可以有勇氣同有貢獻。後來因為呢個的士司機嘅義行，德國記者先成功將光州嘅真相公諸於世，所以莫問小人物定大英雄，在當時情況，係匹夫有責。
講返全斗煥，佢在光州事件後逼當時總統崔圭夏落台，自己做總統，多年來極力壓制光州事件任何言論，直至90年代先被查返轉頭，因軍事叛亂同貪污等罪名本來被判死刑，但後來得到特赦。呢個人嚟到2017年今日都仲試圖掩飾真相，否認責任，仲想告人喎。南韓新任總統文在寅今年講過會重新調查光州事件，又睇吓全斗煥係咪又可以再走得甩。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
