【now.com娛樂】香港又出一個男神，今次唔係明星，係平民。話說兩個男人在港鐵打交，其中一個阿叔打完想走人，旁觀嘅男神一手捉住唔俾走，要佢負返個責任先。呢種見義勇為嘅人在香港本身已唔多，好似當日好多人圍觀，都係得佢一個夠膽做炸兩，其他人全部企開幾步，在安全範圍食花生。再加上佢被人影到，原來好靚仔，咁得喇，又Man，又靚仔，兩樣加埋一齊，女仔見到即時心心眼，男仔見到都會覺得佢有型。既然見埋報，做幾日男神，係好自然嘅事。
但有樣嘢係幾矛盾嘅，作為香港人，由細到大我哋都被灌輸一種價值觀，就係唔好蝕底。呢個價值觀涵蓋生活每一個細節，例如唔好被人呃錢，見到著數唔好執輸，再到而家小朋友要贏在起跑線上，其實都係唔好蝕底嘅一種體現。所以香港人斤斤計較，並以斤斤計較為榮（雖然冇人會直接承認），更以斤斤計較為做人處事嘅方針。當然斤斤計較有佢嘅好處，香港競爭咁激烈，乜都唔計，好容易就輸俾人，就算係富二代，完全唔計較的話隨時連副家產都敗埋。
而呢位男神所做嘅，明顯係蝕底嘅行為。人哋打緊交，佢行埋去，容乜易被人打埋一份？隨時捲入紛爭，可能受傷甚至惹上官非。到人哋要逃走，做乜要拉住人？阿媽教落出街唔好多事，呢啲麻煩嘢自然有差佬去做，人哋反咬一口點算？
唔好誤會，我唔係想貶低呢位男神嘅行為，我覺得佢好高尚，但如果你個心係希望擁有一個咁樣嘅男神，現實中可能會失望。或者你試吓代入事件中，如果你係男神女朋友，地鐵打鬥當日都在現場，你見到男朋友上前「多管閒事」，你會好興奮大叫好Man？定係拉住佢叫佢唔好逞英雄？我敢講大部分人現實生活中都會選擇後者，所以香港先會咁少見義勇為。當然冇人會阻止你繼續幻想有個靚仔又勇敢嘅男朋友，但現實中呢樣男仔未必適合你。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
