【now.com娛樂】唔係好明，點解韓國藝人條命好似唔值錢咁，咁容易睇唔開呢？我對條命睇得好重，當然明白人人對生命睇法唔同，但無論遇到幾大挫折，個人點都會對身邊人，仲有少少價值啩？做得幾錯都好，都仲可以換個方式換個角度，去貢獻社會啩？點解咁輕易就放棄自己呢？
韓國正值最光輝嘅年代，咁多樂團，咁多歌手，要做到好似T.O.P咁紅，一啲都唔容易。本來呢啲位置，要風得風，識諗嘅會明白自己嘅影響力，可以某程度上改變社會，令人向善。可惜偏偏其身不正，吸食毒品，傷透歌迷嘅心。
在一個法例唔容許食大麻嘅地方食大麻，當然係錯，但係咪要自殺咁嚴重呢？我好有保留。大麻合法化，在北美同歐洲，已成風潮。唔係講緊覺得食大麻係啱，但講真，佢唔係偷唔係搶，唔係殺人放火，唔係販毒，佢自己食啫，係咪值得一個改過自新嘅機會先？
對我嚟講，自殺係一件比吸毒更錯嘅事，一個29歲，成熟嘅男人，有乜嘢唔可以面對？韓國娛樂圈多年來已經太多人自殺，多到一度成為潮流，點解仲要成為呢個錯誤潮流下嘅一份子呢？
哦，你話，佢唔係自殺，佢食藥過量啫。我傾向相信佢係自殺，原因係抗抑鬱藥同鎮靜劑，要Overdose到入ICU，都唔係容易嘅事，好難會係「誤食」囉。何況在一個咁巧合嘅時間點發生一件咁嘅事，佢係自殺嘅機會好高。
可能一個人成就越高，跌落嚟就越痛，你想繼續做人啫，輿論想逼你一死以謝天下呢？但真係㗎，留返條命，即使做唔返天王（其實都未知，做得返都唔奇），爛船都有三斤釘，T.O.P仲可以影響到好多人。香港最興㗎啦，哦你吸毒，戒毒後出嚟做禁毒大使啦！其實都係一條路，如果佢覺得今次係錯誤，就應該面對，令更多人唔好再犯自己嘅錯誤，而唔係選擇一死了之，令更多人效法用自殺去逃避責任。當然如果係抑鬱影響，就冇嘢好講啦，但在可控制嘅意識裡面，都應該要做個負責任嘅人，我係咁覺得。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
