【now.com娛樂】世道唔好，生活艱難之餘，仲要面對唔知幾時會發生嘅恐怖襲擊。人永遠唔會明白，點解在英國睇個演唱會都會冇咗條命？或者咁就冇咗隻手，冇咗隻腳？一個二萬人嘅場館，演唱會散場時突然炸彈爆炸，爭先恐後逃生嘅場面，在香港呢個相對安寧嘅社會，係好難想像，但係咪代表香港人唔需要理會呢？我覺得世界繼續咁樣發展落去，總有一日會發生在香港身上，香港人亦需要警惕，或至少有個心理準備，應當如何面對。
你話係咪冇可能遇到恐襲呢？當然唔係，世界已經唔係好似以前咁大，去歐洲旅行或做嘢，已經好Common，隨時都可以起行。外國人嚟香港搞活動亦都唔少，原本Ariana Grande 9月就會嚟香港，?家仲嚟唔嚟當然唔知啦，近少少6月尾有Britney Spears，都好多外國人睇。呢啲場合，香港係咪有能力防止恐怖襲擊發生呢？我抱有好大疑問。
亞博館保安係點大家心知肚明，選舉咁大件事，都可以有兩部電腦被偷，幾百萬選民資料落入有心人手。咁如果調返轉，唔係偷兩部電腦走，而係放兩個炸彈入去，又會發生乜事呢？我都唔敢想像呢個冇掩雞籠爆起上嚟啲觀眾點算。
仇恨亦都冇路捉，你唔會知道香港幾時會入咗恐怖分子個List。大家都知，香港人口稠密，如果恐怖分子鎖定香港人做目標，咁大家邊度都唔使去喇，淨係地鐵都玩死你。幾個月前單地鐵縱火，多人受傷，如果變成炸彈爆炸會變成點？最重要係，地鐵每日幾百萬人次上落，能唔能夠阻止人帶爆炸品上車？冇乜可能囉。
仲有好多異常密集嘅區域，旺角、中環、銅鑼灣，大時大節，或放工時間，好多時都人貼人，發生起事上嚟又係冇得走。住喺香港，真係避無可避，同時亦控制唔到恐怖主義向世界各地散播，除咗求神拜佛唔好吹嚟香港之外，諗真，真係好似冇嘢可以做，惟有提高自己防護意識，走難起上嚟都快兩步先。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
