【now.com娛樂】呢幾日都可以話係星二代爆發日，翁嘉穗大仔Jason破香港三項舉重紀錄，馬德鐘個仔馬在驤去澳洲游水比賽又攞全場總冠軍，兩個都仲好細個，前者16，後者18，仲係中學生。
7、80後可能發現，好多以前熟悉嘅明星，當年仲係後生仔，?家已經做咗星爸星媽，時間過得真係快，令人唏噓。題外話，有時見報紙佬寫得衰，乜都加個「半百」在前面，好似半百葉子楣點點點、半百甄楚倩又點點點。喂大佬，人哋90年代走紅時廿幾歲，嚟到?家咪50幾歲囉，時間會過㗎嘛，同埋就係過得咁快，呢啲標籤係唔係多餘先？寫嘅記者寫寫吓都會發現自己已經半百，有乜咁奇？
係啊好多明星都已經仔大女大，可能有啲人會覺得星二代一定好著數，起碼老豆老母有名氣，讀唔成書出嚟做明星都仲得。確實有啲係幾紅，紅到好似謝霆鋒咁，佢老豆謝賢當年都紅透半邊天，個仔而家青出於藍，紅遍全大陸，拍戲拍到悶開始煮嘢食扮埋廚師?，而想當初，都係靠老豆名氣先入到行。又或者好似劉愷威咁，一樣紅遍大陸，估佢唔到在香港半紅不黑，返大陸撈得咁掂，楊冪都娶到返嚟，成就高過劉丹好多啦！
有啲未去到咁紅，但尚算搵到啖飯食，欣宜同肥姐秋官仍然相差甚遠，但捱咗咁多年，叫做養得起自己先。欣宜係媽媽走咗之後先正式入行，母蔭都係來自世叔伯，一啲積落嘅人際關係，大部分都係靠自己努力得來，其實算係咁。曾志偉個仔曾國祥，最初入行係做演員，同時都有做導演拍吓片，唔經唔覺都十幾年了，最初普普通通啦，係導演天份爆發，行咗一條同曾志偉唔同嘅路，睇落去好似好生性咁，其實……都真係幾生性，《七月與安生》好出色。
入到行係一種幸運，但入行後要背負嘅陰影有幾大，就要睇吓你老豆老母有幾紅。林子祥個仔林德信夠靚仔喇啩，你睇吓佢撈成點？拍戲一嚿飯咁，就被人話好似唔似似老豆；唱歌唔叻，就被人話點解遺傳唔到林子祥天份。大佬，做乜都拉埋個老豆嚟比，點做落去呀？但無辦法呀，鬼叫你入到行都係父蔭咩？石修個仔陳宇琛都慘，改埋個藝名叫石仔，好似好著數咁，其實望住佢個樣，大部分人係叫唔出佢個名嘅，呀乜你原來姓陳！咁其實都唔使點做落去啦，做乜人哋都以為係老豆幫嘅，買樓、娶老婆、開公司，其實你話唔係老豆幫手，都冇乜人信。
被陰影籠罩，渾渾噩噩庸庸碌碌都未算最差，做星二代做到變犯人，其實都有。成龍個仔房祖名就係例子，老豆係成龍，做乜都戴住成龍個光環，連藏毒都關成龍事，唔識教仔喎，我係房祖名的話，都幾冇癮。講返轉頭，謝霆鋒都頂過包，但佢叻仔，靠自己捱返出頭，?家調返轉頭，人哋會話謝賢係謝霆鋒老豆，呢一啖氣，真係唔易爭得到。
嚟緊仲有好多星二代唔知會唔會入行，除咗之前講馬德鐘個仔馬在驤，仲有邱淑貞個女沈月，陳奕迅個女陳康堤等等。講真，生得咁靚，唔入行好似好浪費，但入行呢？又唔知頂唔頂得住個陰影。除非佢哋做到好似竇靖童咁，仲有性格過王菲，鍾意就做，唔鍾意就啋你都傻，唔受世俗影響，就做得過喇。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
