【now.com】黃子華在棟篤笑講笑咁講：「做男人最高境界莫過於『發達升官死老婆』」，這句話非子華神創作，都是引述一些「民間智慧」所來，但實在不明白，一對夫妻再不和諧，都未至於要生要死吧，改改個字，「發達升官換老婆」，有否易接受些？
鄭俊弘（Fred）由路人甲捱起，就連強姦犯、嫖妓不找數的賤滾友都演過，一個唱歌節目《星夢傳奇》，卻令他由七線咖哩啡，變成最近在《與諜同謀》中的二線男主角，有得同羅嘉良合作。這的確是一個傳奇故事，正正應驗了發達和升官兩大條件。至於「換老婆」，老婆未有，女友倒換個不停。
自Fred跑出以來，就有被指原來是花心底，先跟青梅竹馬的姜麗文（秦沛女兒）分手，後又傳出跟《超級巨聲》第一季參賽者王嘉儀及港姐蔡思貝有過往來。直至今個星期，就被雜誌踢爆他原來一直跟隱藏富家女友Beebs拍拖，兼在上年8月求過婚，但隨後又暗撻何雁詩。搞到咁大件事，Fred起初不作回應，只有何雁詩在IG寫上︰「Time to write some music and be strong. #清者自清 #行得正企得正」令人聯想到是女方在不知情下成了第三者。
見勢色不對，Fred終於亦現身自己台的節目，來個獨家訪問講出一二。不過那些一二又真係好一二般表面，來來去去都是怪自己處理感情事不當，成件事就當上了寶貴一課等等老掉牙的說話，至於幾時求婚失敗幾時分手統統冇答，以免講多錯多，甚至連記者追問他訪問期間是否想喊，他也以大台劇對白的質素回應︰「落淚自己收埋，叫自己堅強，公司同屋企人好支持我，令我感受到愛。」
實在好想叫Fred在這刻，自彈自唱番自己首《投降吧》︰「這懸崖何時會墮下 難盛載到三個吧 投降吧我沒有辦法 無能力讓你歡顏 如為你我就退下去 別再拖好嗎」一朝得志，總會有語無倫次的時候，想不到是吃了十幾年蕉先得志的，一樣都會，原來發達升官同老婆是有真的有著必然關係，只屬遲早問題。要破解？方法是有的，根據阿叻陳百祥在電影中的金句講過︰「女人80歲前都唔好畀飽飯佢食！」以此推論，係咪要「男人80歲前都唔好望佢發達」咁可悲，大家先可以相安無事，同渡快樂甜蜜的患難生活呢？
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
