【now.com】又係岑應，香港最有話題真人騷編導，新作《有樓萬事足》食正而家冇樓百事哀嘅社會氛圍，再搵個女仔Seasun（話時話第一次見到呢個英文名，又學到嘢），大爆金句，「無樓唔好白撞」，「有樓有高潮」，真係聽到都懷疑自己有高潮，反白眼反到去後腦。
最有爭議係，佢心目中「目標價」係何文田兩千呎單位，覺得咁樣係男士對佢表達愛嘅方法喎。先唔論香港有幾多人買得起何文田兩千呎單位而又available，買咗又落唔落佢名，但你話如果追佢幾簡單，成大條門檻打開大家睇，有兩千呎，就有性有愛有高潮；冇，可以慳返啲時間轉目標。有人話佢咁樣好cheap，有冇搞錯，我覺得好expensive囉。而其實我對佢冇反感，一來我唔信佢講真說話，稿嚟啫；就算佢講真說話，佢都有自由，咪當見下世面，識多種人。
一直以來岑應嘅節目都出好多爭議話題，好似之前《沒有起跑線？》嘅「贏在射精前」、《盛女愛作戰》兩性關係導師Santino嘅「45度角」、《沒女大翻身》嘅「公主癌」等等。我明白呢一刻電視業依然係話題主導，但將一啲社會問題攞嚟做gimmick，我唔認同。除咗灌輸緊錯誤觀念，亦深化一啲原本已經難解決嘅問題。女多男少導致單身女性增加你點解決啫？樓價太高導致年輕人上唔到車你點解決啫？當然冇人要佢解決，但係唔係搵人拍個真人騷然後將唔同群體貼上標籤，就叫做反映咗問題？
唔係啩？難道有樓有高潮可以代表香港女性心態？咁樣港女港男好無辜囉，女性以後講親個「樓」字（喂呢個係切身問題，結婚買唔買樓梗係要傾啦，現實係要生活，點可能齋講心完全唔講金），就被人問候「你啲港女係咪冇樓就冇高潮先？」以前最多都係話你拜金啫，而家句說話去到咁難聽！冇辦法，人哋咁樣定義咗，大大個標籤夾硬貼在你額頭，你做得香港女人，就要承受。
最後邊個得益？都係個節目，同埋啲媒，好似今次嘅Seasun，以前嘅Mandy、Rocky、Irene等，可以話求仁得仁。講返轉頭，女人係咪要有兩千呎樓先會有高潮？我唔知，我又唔係呎數兩性專家，但有一點我可以肯定嘅係，做真人騷節目，有媒就有高潮，無媒唔好白撞，製造到社會輿論咁就萬事足喇。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
