【now.com】又到咗又要鬧又要睇嘅時間,正確嚟講,今次係睇到人鬧再搵返條片嚟睇。講緊大陸唱歌比賽節目《歌手》,裡面有個來自哈薩克嘅年輕男歌手迪瑪希,翻唱Vitas經典作品《Opera 2》,係勁嘅。其實呢首歌都聽咗十幾年,迪瑪希把聲隨時靚過原唱,係差咗啲火候啫,始終Vitas都唱咗咁多年,係穩陣啲,不過呢,有三樣嘢,迪瑪希係贏返Vitas轉頭嘅。
第一,迪瑪希贏靚仔,個樣現代啲,Vitas靚得來老土。但咪話唔提你呀,如果你俾佢迷倒,千祈唔好買佢隻專輯呀,係千祈千祈唔好買呀,唔係會被封面個樣嚇親㗎。
第二,贏觀眾。啲觀眾好似成世未聽過歌咁嘅,聽到高音就狂歡呼,甚至聽到落淚。《Opera 2》喎,第一次聽咩?咁可能真係啦,但感動到喊都真係犀利,唔怪得海洋公園咁多大陸人鍾意去,原來唔係去玩,係去聽海豚音,搵返啲感動。
迪瑪希號稱唱到四至五個八度,同Vitas一樣,但流行曲,係咪單單計闊度嘅呢?係就唔使比賽,行出嚟,每人唱自己最低同最高個音就搞掂,一集就拍完,使乜拍一季?香港人從來都唔係聽開啲咁高難度嘅流行曲,陳奕迅我估唱到三個八度嘅,但呢個未必係佢紅嘅原因;楊千嬅都紅啦,唱兩個都好似勉強;鄭伊健啲歌都膾炙人口,佢穩穩陣陣唱到一個已經夠搵食。咁當然,呢個比賽節目目標觀眾都唔係香港人,又唔使理我哋口味嘅。
第三,贏面皮厚。佢可以完全無視版權,公開比賽唱人首歌,正常人都會去攞個授權,佢就次次都唱咗先算,然後冇咗件事,仲夠膽死將自己個version擺上微博賣,淨係夠惡都已經贏Vitas幾條街。搞到Vitas話要用法律途徑解決,你話幾肉酸先?我講緊Vitas呀,一個俄羅斯歌手點告得入一個在微博賣歌嘅哈薩克歌手係一個問題,另一個問題係,幾時輪到你呀?有冇常識㗎,在大陸發生嘅版權問題,知唔知要排隊㗎?再嘈將你所有歌唱一次都仲得呀!
P.S.唉……究竟曲線幾時先可以唔使再講明。
文:魯連
〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。
專欄屬作者個人意見,不代表本網立場。