【now.com】游學修呢兩日自稱福爾摩斯上身，原因係佢要著手調查自己欣賞了好一段時間嘅少年YouTuber Ben哥，到底有冇被人利用作搖錢樹，但正因為這件事，令他樹敵之餘也受敵。
其實成件事真係唔關游學修事，事源早年仲係小朋友嘅Ben哥，因為一條教人點樣成為YouTuber的片，其純真的演出為佢吸納不少粉絲，據游生所講，佢都係Ben粉之一。不過你覺得佢純真可愛，有更多人覺得佢傻更更，紛紛報以恥笑、惡搞、中傷等行為，從而令Ben哥曾「淡出江湖」。直至早前佢再次現身，今次唔係教人做YouTuber，而係教人點樣喺年宵花市開檔做生意，仲推介埋一個App。
老實，就咁睇條片，唔覺有咩問題，係擔心佢真金白銀整咗12個咁「可愛」嘅攬枕出嚟，到底賣唔賣得出去，仲話所有收益會撥捐無國界兒童基金，不過細佬孤陋寡聞，有聽過聯合國兒童基金同無國界醫生，硬係就冇聽聞有個慈善團體叫無國界兒童基金。
亦正正就係呢條片，游學修睇到之後突然爆Seed，話覺得有人喺Ben哥背後消費緊佢只得15歲、未成年嘅童真，借咗佢嘅影響力去谷自己個App，於是就發出一篇千字文去斥責呢種行為。當然，你話人消費時，人亦話番你喺度抽水二次消費攞光環。咁作為YouTuber的游學修，自然要拍片反擊。
整件事其實有啲小事化大，旁人眼中甚至會覺得無無聊聊，何足掛齒，但因為游學修惜才，不想呢位具赤誠嘅小伙子被利用，才出口相助，希望踢爆整件事嘅真相。不過就喺踢爆期間，游對幕後黑手作出大膽假設，曾暗指是另一KOL的經理人邵子風。俾人話借細路搵錢喎，冇做到嘅更係要爆Seed開拖。但邵沒有，而且澄清完仲加把口力斥幕後操控者要不得。游知衰咗，亦都即刻出post澄清再三認錯，總算企定定俾人打找數，抵讚。
由此至終係咪多管閒事，就睇個人價值觀，不過胡亂去猜測幕後黑手呢個行徑，真係存在風險，好容易誤中副車，傷及無辜。喺你做福爾福斯前，不如做住一目偵信先，明查暗訪係咪好啲呀！
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
