【now.com】自上次幫徐濠縈出頭，大家已經知道蘇永康（阿公）實在是一件惹火尤物，一旦點着佢就不可收拾。只係估唔到，正由阿公「降級」到做準爸爸的他，向大家宣布呢件開心事時，都要辣下火頭。
提到對個仔嘅期望，阿公除咗自嘲話唔好似自己外，仲突然跳掣，講明：「我唔想生個梁天恆（梁頌恆），我唔想生個游蕙禎，我要佢識分莊閒，你可以反叛，但絕對唔可以做啲背祖忘宗分裂國家嘅事情。」講得呢段說話，就預咗刺激到大眾，果然言論一出，立即引來一堆指罵，又「愛國康」，又「偽人」，又拎番佢首《有人喜歡藍》嚟笑。
當然去到指罵階段，最好就係又數番對方黑材料，最黑一單莫過於2002年，阿公在台灣涉毒被捕兼遭勒戒，不過呢單嘢轉個頭就被阿公作為最佳嘅例證，證明自己一人做事一人當，說明當年台灣同香港冇引渡條例，如果逃避刑責可以一走了之，但佢選擇照樣返台灣戒勒十日，證明自己做錯事肯認肯承擔。言論互飛互插，一直未停過，阿公更開OT，專注去刪留言同block人。
一直以來，藝人最想企中立個位，我只唱歌不談政治，我不喜歡政治，我唔識政治，一個理由十種講法就係想令自己順得哥時又得嫂意，既得到香港樂迷支持，又不失內地廣闊的客源。而從阿公向來的取態，都係走中間路線居多。至於今次言論，在冇人問佢、冇人裝佢、冇人試佢之下，自爆出嚟！唯一解釋就係佢的確好討厭梁游二人嘅行徑，千個萬個唔想自己個仔將來似兩位。
今時今日，社會的撕裂程度真係去到兩極，無咩必要，一家人坐低食餐飯都唔好提藍定黃，提下《致命復活》邊個係主謀好過。至於阿公，喺呢個風頭火勢日子，冇病冇痛下都要自燃引爆，呢下阿公的抉擇，都值得俾個服字佢，總好過時時刻刻都表現得無稜兩可嘅人。最多以後再聽《有人喜歡藍》時，彷彿有一股弦外之音咁，好想熄鬼咗去！
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
