【now.com】我好鍾意睇廣告，當然係指高質嗰啲，我覺得香港仲有好多人才，雖然坊間抄襲成風，但創意未死晒。每年《金帆廣告大獎》都會留意，不過今件慘喇，ViuTV從TVB手上搶得轉播權，本來係美事，因為可以在一個我鍾意睇嘅台睇鍾意嘅頒獎禮，點知一個屈尾十，因為頒獎禮有TVB藝人出席，TVB就以藝人唔可以亮相其他電視台為由，要主辦單位香港廣告商會唔畀ViuTV播。真係痴線，以前亞視收檔之前，搞咗個《萬眾同心撐亞視》節目，TVB直頭搵一大班當紅演員拍埋打氣短片畀亞視播，咁叫唔叫旗下藝人亮相其他電視台呀？兩年都未夠，你個標準轉得咁快嘅？
而從TVB呢種行徑，可以睇到三件事。一，佢當客戶死嘅，《金帆》係表揚優質廣告，表面上係捧創作人同廣告公司，但啲廣告點嚟？都要客戶畀錢㗎，客戶冇眼光點會俾到廣告公司發揮？所以最威都係客戶，?家班客開開心心扮靚靚走去領完獎，轉頭你唔畀佢播，佢哋顏面何存呀？辛苦一年，出吓鏡都唔畀，你有幾錫啲客，心中有數啦。
二，為打擊對手不惜扼殺新人表現機會，出席頒獎禮嘅除咗藝人，仲有新一屆香港小姐香港先生，兩個主持係你哋台嘅新人岑杏賢同郭田葰，好啦?家你一句說話呢班人幾乎白做一晚喇。最慘兩個主持，做大節目機會本來已經唔多，有得做冇得播，就算做得幾好，?家都冇人睇到啦！
三，對自己台慶都唔係好有信心，一聽到ViuTV打算喺TVB台慶當晚播《金帆》，即刻出招，喂，你全年最勁最齊人最把炮最萬千星輝嗰個節目，唔係怕個《金帆》吓話？定係你怕對面太有創意，顯得你哋冇呀？好心你生日就寬容啲，心胸狹窄賀台慶，邊會高收視㗎。
就算你唔畀面客戶，唔理新人死活，唔怕人話你小器，都應該畀吓面卡片蘇吖，人哋蘇錦樑都有出席，一年一度拋頭露面，而家俾你搞一搞，又冇人睇到喇，你點還返個政績畀佢先。
ViuTV都要鬧，都唔夠吉士，人哋咁樣大石笮死蟹，利用霸權為所欲為，呢啖氣都吞得落？《金帆》係推崇創意，呢個關頭好應該發揮創意，佢哋啲藝人唔可以在ViuTV亮相，咪發揮你哋嘅小宇宙，剪鬼晒啲TVB藝人走囉。最麻煩係兩個主持都係TVB人，玩大啲，打佢全身格仔，聲音都經過處理，再唔係又剪走埋佢，自己重新搵兩個主持好似講波咁搵廠景拍完再key返落去，睇吓邊個肉酸？你搞唔掂，出聲，廣告界大把癡線佬，肯定一堆神人衝出嚟幫手，實陪你玩到底。一個玩到盡嘅頒獎禮，又有型，又唔輸，又好睇，又何需要屈服呢，你忍得佢幾多次？
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
