【now.com】好多喜歡睇電視嘅人已經將焦點放在大台《致命復活》上，係唔差的，但有套劇仲好睇，又係免費就有得睇，仲要係大台最鍾意拍嘅爭產劇，名就未有，要改都係「地產風暴」之類。主角唔使講，梗係劉鑾雄（大劉），劇情係大劉身體抱恙，有生命危險，兩個女朋友爭佢副身家，大嘅被趕出家門，細嘅地位急升。有人組律師團有所圖謀，未登天子位，先置殺人刀，有人就選擇做跟得夫人貼身照顧。通常呢啲劇，都係等緊張遺囑點寫，有錢佬點樣在死前改變主意，引發大戰，但劇情發展得峰迴路轉，病到瘦幾圈嘅大劉，已經康復，仲走出嚟鬧爆大嗰個。佢指點細嗰個點樣對抗「奸角」，個方法好得意，唔係傳統咁在病床前叮囑，而係在記者面前發表偉論。佢根本唔驚個對手知道自己嘅部署，咁都好嘅，如果甘比有日記性唔好，唔記得大劉講乜，都有全香港人可以提醒佢，呢招平民真係學唔到，要有名望先得。
呢單嘢，真係只能睇劇咁睇，正所謂耳聽三分假，眼看未為真，邊個係人邊個係鬼，觀眾點知？到最後邊個攞到副身家，都唔關香港人事，而且呢度又唔係法庭，錢係大劉嘅，佢話係就係啦，我哋講乜都影響唔到個結果。我哋其實都唔係真係想睇證據，只係希望睇到劇力。咁套劇上映幾日，又真心精彩嘅，好似噚日大劉見到有報道話佢刻薄呂麗君，送手袋都要收返。呢種回收情節，在富豪間曾經廣泛流傳，有富豪因為成日換女朋友，所有珠寶首飾返屋企都要除低放返入保險箱，留畀下一任戴，不過當時個主角唔係大劉，而係另有其人。可能發生過呢種事，所以今次話大劉收返手袋，都唔少人信，激到佢主動畀證據大家睇，送禮都送咗成億，連簽收份文件都擺埋出嚟畀觀眾睇。當然仲要度定金句，「做過就絕子絕孫」呢句講得太多，已經唔Powerful，今次度咗句「說謊的女人」，好90年代，我鍾意。
兩個女主角都有戲份㗎，甘比暫時個角色正面啲，又湊女放學，又食雪糕，又唔大洗，仲珍而重之幫大劉送畀佢嘅手袋鋪張紙巾。呂麗君就慘喇，大劉日日數臭佢都算，又影到佢個女在大宅內跑步都幾個下人跟實，個女在前門跑步，你在後欄呻窮，又真係講唔通喎！睇到佢就好似睇到《溏心風暴》細契關菊英咁，大劉話佢睇錢緊要過生命，我信兩成啦，又真係珠寶都成億，升咗值賣出去都兩億，唔計其他錢，一個人身懷兩億仲唔滿足？兩億同二十億、二百億，分別喺邊？兩億都足夠一世人無憂無慮舒適生活啦！細細個已學識一個智慧，得些好意須回手，唔係放過人，而係放過自己，凡事太盡，到頭來連手上嘅嘢都冇埋，就得不償失。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
