【now.com】新一屆金馬獎入圍名單公布，提名名單中，最佳男主角有三個香港人，包括梁家輝、張學友、許冠文。一個台灣頒獎禮，影帝佔咗60%提名，香港都咪話唔威！不過，影后提名呢，就一個都冇。呢個都係正常現像，事實上香港現在有叫座力嘅女主角越來越少，應該咁講，莫講叫座力，做到電影女主角嘅香港人，已經唔多。
即使係香港自己搞嘅香港電影金像獎，每年有五個最佳女主角提名，但近呢五年，每年都係得一、兩個香港女演員角逐，最叻都係三個。當中「後生」嘅有楊千嬅、鄭秀文、江若琳、顏卓靈、蔡卓妍、林嘉欣，「成熟」嘅有葉德嫻、鮑起靜。其實近年做得到電影女主角嘅呢度已經差唔多數晒，最多加埋薛凱琪、惠英紅、周秀娜、劉心悠、Janice Man、陳靜。新晉嘅除咗顏卓靈，可能得返個蘇麗珊。
得獎嘅都一樣，對上一個金像獎港產女影后，已經係四年前《春嬌與志明》楊千嬅，之後幾屆係章子怡、趙薇、春夏，都係大陸演員。攞獎我冇乜意見，因為唔係睇邊度出世，而係論戲。攞返數據出嚟，純粹係想講吓香港女演員青黃不接到一個就快絕種嘅地步。
原因已經講咗好多年，係合拍片帶嚟嘅副作用。始終香港男演員叫座力普遍高於女演員，除非你吓吓出個鄭秀文，否則都係用返國產女演員搭個香港男主角穩陣啲。而家選演員就好似砌啤牌一樣，要用好多智慧，求穩陣多，想要有啲創意陣容，一係唔上大陸，一係就諗爆你個頭。
新演員唔係冇，消失嘅係向上爬嘅階梯，十幾廿年前上咗岸嘅就永遠都上咗岸，新演員只可以拍細電影，最多去到三線，在大電影撈個配角做吓，一係高一係低，冇中間位俾你發展。演員有壽命，好快當上咗岸嗰批唔拍戲，香港就冇晒一線女演員。可能你覺得冇所謂，有幾大件事呢？都係嘅，只不過係一個曾經傲視亞洲嘅電影王國，冇晒女演員啫，仲有男演員吖嘛！
香港男演員，其實都走緊呢條路。我哋呢一刻仲有古天樂、劉青雲、吳彥祖、周潤發、甄子丹、張家輝、四大天王、梁家輝、謝霆鋒，陣容何其鼎盛，大陸開戲都隨時要靠我哋呀！但將來呢？呢堆演員之中，除咗吳彥祖係1998年入行，你搵唔搵到一個係回歸後先入行呢？而家最多戲拍嘅余文樂、周柏豪、王宗堯，你又覺得俾多廿年佢哋，係咪就上得到去呢？
合拍係救命丹，但唔係唔使還，息口仲好高?！
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
