【now.com】其實唔明，而家係選港姐，定係選唔可以講粗口者？今屆香港小姐冠軍馮盈盈被揭在 Facebook講粗口鬧政府鬧梁振英。嘩，原來而家講粗口已經係黑材料，講到咁嚴重，唔知仲以為佢貪咗五千萬。
有人話港姐唔應該講粗口，俗啲講句，就同高登仔話靚女唔屙屎一樣咁諷刺，香港地，要搵個完全唔講粗口嘅都幾難，但搵個心腸壞嘅就好容易，我真係唔明講幾句粗口有幾大不了。
廣東話粗口係藝術，有境界之分。需要時爆一粒，可以增強語氣，令意思更活靈活現，有畫龍點睛效果，此為高；開口埋口都係粗口，完全為講而講，就為之爛口，此為低。選一個識講粗口嘅港姐，同選一個爛口港姐係兩回事，香港人無理由唔識分。
有啲場合的確唔適合用粗口，例如教書，教書係教文雅嗰part，粗俗文化學生自己生活就有得學，唔使教，但若要將粗口作為文化研究，一樣得，好似Ben Sir歐陽偉豪咁，佢就睇到粗口嘅價值。又例如寫稿，唔係個個網上media都可以寫粗口，呢度好似就唔得，所以我都勒住勒住。再例如在電視機前面，因為有廣播條例，合家歡時段唔可以播粗口，其他時段都係免得過就免，講咗好麻煩，你問劉德華同梁漢文就知，所以馮盈盈選港姐對住鏡頭係唔會講嘅，但阿叻做司儀講，又冇事喎，只許司儀鏡頭爆粗，不許港姐粗口寫post，咁得意嘅。
粗口仲有一個實際用途，唔係助語詞，直頭係發洩渠道，一種比一般語言更有力量嘅詞句，尤其是急起上嚟，唔係人人都有智慧同耐性，用幾個比喻去兜個大圈鋪陳想表達嘅內容。文人才子罵人不帶髒字，邊個唔知咁樣最高，但十個才子九個私底下都食煙飲酒講粗口，誰說雅俗在同一人身上，不能共存？
呢個時勢，的確多咗人講粗口，唔講都知係環境逼成。當每日聽到嘅語言偽術仲難聽過粗口，當議會暴力完全超越言語暴力，政府倒行逆施程度乃這一代香港人出生後未見，好多事唔用粗口根本發洩唔到。香港的確有一群人完全唔講粗口，例如我有一班教徒朋友，聽我哋爆粗時總是笑咪咪，自己從來唔講，但其中有幾個都因為政府衰到一個地步，令佢哋忍唔住破咗戒。我相信佢哋講完個心都唔會舒服，但屈埋屈埋咪仲痛苦。
記者quote返馮盈盈爆粗嘅post，鬧鍾樹根誣衊雨傘裝備藝術為武器，鬧反佔中阿伯胸襲女示威者，鬧梁振英（呢段都冇粗口），有邊樣唔值得鬧？有邊樣用粗口係用多咗？那時，那刻，難道你可以心平氣和？
高貴，優雅，冷漠；粗口，激動，關懷。選港姐也好，選朋友也好，我都會選後者。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
