【now.com】政府向奇妙電視批出本地免費電視節目服務牌照，好多人有疑問，究竟有線會唔會真心想搞免費電視？如果冇心搞，不如俾王維基好過啦。我想講，其實以一個收費台來講，有線過往製作過好多好節目，曾經有段時間，佢哋係香港最創新嘅電視台（雖然都好耐之前，已成歷史）。
時間回到2003年左右，當時大家申請得有線都係為睇英超，但有線另外自行製作好多節目，亦做到留住觀眾嘅效果。最出色一定係娛樂新聞台，而家好多已經過咗TVB嘅熟悉面孔，例如黃翠如、陸浩明、區永權、衛志豪、梁嘉琪，甚至鄭中基老婆余思敏，都係來自有線娛樂新聞台，當年環顧所有電視台，娛樂新聞做得最好就係佢哋，好多報導方式甚至拍攝角度、講稿，而家都仲用緊。當時你走入任何一間報館娛樂版，都一定播住有線娛樂新聞台，好多娛樂breaking news都係佢最快，仲會第一時間直擊，情況就如同現在人人都開住蘋果即時新聞補料一樣。當日嘅主播仔，今時今日個個都已獨當一面，全部都係做主持嘅上佳人才，呢個節目可謂主播界嘅少林寺。
其他資訊節目亦非常強，香港最多人睇兩大題材：飲食、旅遊，有線無出其右。《肥媽私房菜》仲好睇過而家佢做《食平D》幾十倍，《一粒鐘真人蘇》做起咗蘇施黃，bitchy有市，亦都估佢唔到。《活得很滋味》黃翠如洪永城去旅行，拍得出兩個大鄉里出城看世界嘅喜感，而家睇返都仲係好好笑，而家好多旅遊節目都用呢種做法，當時邊度有？
神怪嘢亦係有線獨市，玄學節目有《峰生水起精讀班》，將風水命理平民化。唔止蘇民峰，李丞責都係有線做節目先開始真正入屋。不得不提王牌節目《怪談》，真係非常出色，雷宇揚、施明、梁思浩個個都係鬼王鬼后，仲有司徒法正師傅，一班人走去各大猛鬼地點探靈，疑似鬼上身都試過，絕對係一個名留香港電視史嘅節目。
有線曾經帶領過好多電視潮流，有過一段非常輝煌嘅日子，遺留落嚟嘅資產仍然有好大價值，只不過走晒去TVB啫。雖然人才流失，但如果夠膽創新呢個核心思想冇變，係值得發展免費電視，其實而家網上好多奇才，可能有部分都想嘗試正規電視製作呢？
再加上有線最大負面形象，「希特拉都cut唔到有線」，亦會隨住變成免費而唔再存在，都免費咯，希特拉都唔會勞氣，可以專心打仗啦！既然有線收費電視年年蝕錢，何不盡地一煲做好個免費台，可能反而搵到條生路。好多人話佢想賣盤，我覺得唔合理，呢個年頭盤數唔靚邊個買？你估仲好似以前錢多到冇地方洗咩？用心做好本業，先係亂世生存之道。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
