【now.com】大家會否覺得，今次ViuTV開台，TVB對它不單沒有嚴陣以待，其反擊行動亦好像比上次香港電視為少。個人特別觀察了前後兩星期，照道理，對手在4月6日出戰，你踏入4月頭來個變陣，讓觀眾有新鮮感也合情合理，實情是TVB好像武林高手上身，以不變應萬變、一動不如一靜、無招勝有招……全程就來一個按兵不動！
對手開台一星期，TVB仍然似觀戰多於作戰，而且該心態連帶劇集安排都一致，一線劇以福將毛舜筠加黎耀祥作主打，以最穩陣的舉動打個頭注，可理解。但有需要穩陣到連劇名都繼續《愛‧回家》嗎？新劇都要叫番做《愛‧回家之八時入席》。「愛回家」三個字在好幾年前已完美地代表婆媽、誤會、膠，在一個要求革新的戰局下，實在冇保留的價值。所以眼前這行徑，就似一眾建制議員、局長官員，扭盡六壬去為特首補鑊一樣，不禁要問，為乜呢？
一線劇出師不明，二線劇仲離譜，派出倉底貨《末代御醫》迎戰《太陽的後裔》，此舉擺明投降算一半，覺得對手太強點都死，倒不如派個未夠磅數的上台，預做炮灰之餘，即使輸都有得賴，甚有不尊重對手之嫌。
好了，踏入今個星期，到主打出場，第三線劇《殭》。老老實實，該劇由開拍一刻已強烈感到濃濃的《我和殭屍有個約會》氣味，這種題材是為年輕人而設，但又走去抄一套18年前的作品，到底係咩玩法？電腦特技似已經落足本錢同心機，不過以頭三集看，特技水平仍流於怕你唔知用咗的層面。該劇一個自命吸睛位是有女神謝安琪演出，但Sorry，角色設定她少女心滿瀉，處處可愛到漏的演出，真係……真係可唔可以嗌水吧換過杯少甜嚟？全片最佳設定係陳凱琳有失語症，只能以Memo紙同人溝通，終於有機會嘗試去留意她的演技。
可能今次ViuTV沒有向TVB作台前幕後大規模挖角，亦沒有主打劇集攻勢，而是從綜藝節目旁敲側擊。整體覺得TVB是在放軟手腳作賽，或者上次對手來勢洶洶最後都要敗走收兵，今次又何足掛齒呢？事實上，上次對手被逼作網上播放，簡直是上陣前慘遭割讓雙臂，先天不足，勝之不武。但今次對手是同等身份的免費電視台，一按即是，絕對是雙拳對兩手，看不出有甚麼輕敵的理由？結果上星期收視一出，即見真章。
到底是過份老定，還是根本無兵可用，最好的已盡出呢？冇人知，但可以肯定，若果是後者的話，這個僵局將會僵過套《殭》，遲早見血。
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
