【now.com】「有人愛上Juno」是麥浚龍（Juno）2002年推出首張專輯《On The Road》時的宣傳語句，因為碟內有首主打叫《有人》。這句話火速成為笑柄，大家反應都是「有鬼人鍾意佢咩？」如果當年你夠膽講「我愛上Juno」，你只會被歸納為兩類人，一是傻仔，二是收咗錢。事實上，就連同公司的譚詠麟及李克勤在《左麟右李演唱會》上，也以此為棟篤笑內容，笑他除了爸爸媽媽哥哥之外，就只有陳小寶（前唱片高層）愛他。一出道就成嘲笑對象，大概因為他口中那把金匙太耀眼吧！
今個星期，Juno與謝安琪合唱的《羅生門》放上YouTube，突然成為facebook的洗版神器，人人都要post一次。據知這首歌是黃偉文（Wyman）悉心炮製，跟10年前的《耿耿於懷》及年頭推出的《念念不忘》成為三部曲，訴說一個單戀了10年而被拒絕的愛情故事。短短兩天，人人都去分析歌中每一粒字，人人都以被歌詞打動的感受來做Status，一下子廣東歌好像重拾希望。然後去到第三日，洗版潮未退，更衍生出另一現象，人人都趕著認自己老早就欣賞Juno！「好聽點止呢三首，仲有《寫得太多》同《借火》呢？」「其實《有人》同《沒有人》都係呼應，當時已覺得好正！」讚完歌，連電影都唔放過。「《殭屍》係好，但要了解Juno的電影世界，要睇埋《保衞戰隊之出動喇！朋友！》先夠完整」……總之提出的作品愈偏愈冷門愈早期，就愈能顯得你慧眼識Juno。
其實Juno，你早就認識他，回到2002年，當日被一窩蜂力踩的情景仍歷歷在目。由於水源充足關係，推出首張專輯便四處大賣廣告，海底隧道口、地鐵站包牆身、尖沙咀HMV大型廣告板，然後出一隻碟就拍電視音樂特輯，最嚴重是被指花錢買Fans舉牌追車。13年前，大家未懂得用甚麼詞彙去形容這種使錢方法，換轉是今天，大概會以「土豪」來形容。土豪式使錢有種貫徹的後果，就是愈花得多，反響愈大，於是在憎人富貴厭人貧的民風下，全港合力將Juno踩到去天橋底。
「唓！唔通以前做得唔好，十幾年後進步了就唔可以得到大家認同咩？」當然不是，利申，個人亦很早便欣賞Juno，理據是他所花的都是自己錢，關你咩事？而且想合唱，便搵軟硬、草蜢、關淑怡、莫文蔚、謝安琪；想唱片封套有格調點，便找倫敦設計師James Jarvis畫；想執導的電影有氣氛點，便找日本恐怖大師清水崇做監製。明明樣樣都是豪使，所花的錢不會比13年前少，但就贏得「有錢使都要使得有品味」這美譽，試問那份光榮去邊度搵？
電影《中國合伙人》，講三位中國書生搞補習社搞到出晒位，賺到無窮無盡的金錢，但去到美國還是欠一份認同。直至黃曉明捐一筆錢給鄧超初到貴境時，曾工作過的實驗室，並將實驗室以他命名，那份吐氣揚名的感覺，不是十個LV廿隻勞力士可比。同樣，由起初要花錢先有人肯嗌喜歡自己，到今時今日大家在數天內衝住出櫃來高呼愛他，這份滿足感，無價。
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
