【now.com】啟德啟晴邨鉛水風波已困擾幾天，沙田水泉澳邨和葵涌葵聯邨亦相繼發現有鉛超標樣本，香港人已經從「我都係搵啖飯食啫」的生活哲學，昇華到「我都係搵啖水飲啫」的更高層次，再繼續進化落去，好快就會變成「我都係搵口氣吸啫」，卑微原來是無止境。
香港人已習慣卑微，甚至在飲水都唔安心的當下，仍然有能力苦中作樂。鉛水事件引發了好多笑破肚皮的食字，例如叫人注意食水安全會用「飲水思鉛」；面對層出不窮的超標樣本會用「鉛鉛不絕」；形容罪魁禍首會用「鉛罪犯」；灰到盡頭時會用「香港玩鉛」；丈夫係中國建築國際集團股東的蔣麗芸，被稱為「鉛秋」。全部都好好笑，笑得越大聲，感覺越悲哀。
而家最大問題係搵唔到方法保證食水安全。好奇怪，件事牽涉咁多個屋邨，而政府只追住一個水喉匠，背後決策、採購、驗收等等全部冇提過。大大個承建商中國建築國際集團有罪冇罪點都要懷疑吓啩？結果名都唔敢提。結果真係入晒水喉匠數的話，你覺得係咪以後就可以安心用水呢？呢個先係重點。
如果「食水含鉛就水喉匠食晒」的邏輯可以行得通，香港社會絕對會被反轉，我用一些大家睇過的劇集和電影示範一下。《大時代》四隻蟹仔落柯打「做嘢」，掉晒方展博一家落街，其實方展博唔需要搵丁蟹報仇，告班打手謀殺得啦，一個二個打手坐晒監立即結案。主謀？唔好意思，淨係記得有個丁字同蟹字，驚讀錯佢個名，都係算啦。
《竊聽風雲》都拍唔成，操控股價捉個股票經紀祭旗就完事，劉青雲、古天樂、吳彥祖連竊聽機會都冇。操控股價好濕碎啫，若果非長期飲用鉛水唔會影響健康的話，同理，非長期買賣被操控股票都唔會影響股民利益啦，查乜鬼啫？
就連《無間道》都唔使拍咁長，陳永仁亦唔需要做臥底三年又三年，一開始捉傻強返去交差就完事。咁幕後大佬韓琛呢？用梁振英邏輯，總之睇唔到有證據顯示傻強冇犯罪，而黑社會大佬韓琛有犯罪。唔明？好正常，因為冇人明。
文：魯連
〈娛樂乜乜乜〉逢星期一至五刊登將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
