0
0
〈娛樂乜乜乜〉《愛‧回家》可能係香港開埠以來最大的誤會

〈娛樂乜乜乜〉《愛‧回家》可能係香港開埠以來最大的誤會

【now.com】今年3月,最期待的畫面終於出現,膠劇《愛‧回家》終於宣布會大約在800集左右大結局,其中一位編劇更在微博上載一張「804集全劇完」的相片,令人開心到跳起Yeah!雖則接力開拍的是阿旦(鄭丹瑞)炒冷飯之作《高朋滿座2》,但總叫換過班人,尚存一絲新希望。直至前日,大台正式公告天下,緊接《愛‧回家》播出的,將會係《愛‧回家2》。嘩!驚喜真係話嚟就嚟,嚇到個心離一離。實行換換人腳,就當係華麗轉身。當時的心情有如等了5年終於等到梁特首要落台,點知佢臨走一刻又宣布將會連任一樣!塵世間最慘的事,莫過於是慘X2。

網民對此大表不滿,有說膠劇死唔斷氣,令人有家歸不得,又說換湯不換藥,已經家不成家,怨聲載道。或許事件令人憤慨,但你鬧人之前,問問自己,究竟你有冇睇過《愛‧回家》?它的賣點是甚麼你知唔知?總括來說,它的賣點不是演員不是劇情更加不是主題曲,而是兩字︰「堅持」。全套劇能夠撐到800幾集,力量源自編劇堅持為每集設計一個誤會,然後又在同一集內將誤會解開。劇中的誤會大致分成幾種,包括以為你愛同事A,原來係愛我。見阿爸靜靜雞食藥以為生Cancer,原來係生痔瘡。廁所偷聽到老闆話公司將會執……惶恐,原來聽漏咗另一半,係執到批平貨。所以劇集由2012年3月開始,就為大家拆解了800個誤會,如果世上真的有神,好想問神一句︰「到底世上仲有咩誤會係《愛‧回家》未拍過?」

當你知道《愛‧回家》原來有這份獨特個性後,你仲有冇疑問呢?
問︰「有呀!明明話叫咗阿旦開拍《高朋滿座2》,?家當冇咗件事呀?」
答︰「冇錯呀,係會拍《高朋滿座2》,不過你聽得唔清楚喇,唔係阿旦,係阿丹,丹爺個丹(劉丹),咁所以《愛‧回家2》的確係會冇咗馬氏一家囉。至於《高朋滿座2》幾時開拍?等《愛‧回家2》完咗先講啦!」
問︰「喂!咁張『804 全劇完』字樣相呢,咁仲唔係完呀?」
答︰「嗱嗱嗱!有冇留意張相影到個『完』字後就冇咗,其實玄機就喺後面,因為仲有兩粒字同一個標點符號影唔到,就係『得未?』原來呢個只係編劇問監製的問題︰『全劇完得未?』咁好明顯當時個答案係未啦!」

《愛‧回家》對誤會的堅持,可以連成套劇的前途都搞出一個誤會出來,真係就算有機會問到神,神都估你唔到啦。所以《愛‧回家》大可媲美《大時代》及《天與地》,歸類為神劇。唔好又誤會,唔係神級劇,係神經劇。

《愛‧回家》早在700集時已經話會完,但後來添食到800集,?家去到800集喇,就添都唔添,直頭食言,實行借屍還魂。
今年3月,《愛·回家》編劇組在微博上載「804 全劇完」字樣相片,網民以為最期待的畫面終於出現,原來又係誤會。
就啱啱今個星期二第771集,馬子仁(羅天宇飾)感到腋下痛楚,誤以為生淋巴癌,悶悶不樂咗成個禮拜,結果原來係止汗劑令毛孔閉塞。哈,問你死未?

文:余建

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

  1. 更多
  1. 博鰲連日跟政商界代表交流 陳國基︰無人提及23條立法
    博鰲連日跟政商界代表交流 陳國基︰無人提及23條立法
    3小時前
  2. 博鰲連日跟政商界代表交流 陳國基:無人提及23條立法
    博鰲連日跟政商界代表交流 陳國基:無人提及23條立法
    20分鐘前
  3. 【黎智英國安案】李宇軒:曾與裴倫德討論推翻中共 並推動反港區國安法聯署
    【黎智英國安案】李宇軒:曾與裴倫德討論推翻中共 並推動反港區國安法聯署
    58分鐘前
  4. 中國足協:舉報足球「假賭黑」 最高獎勵二萬人民幣
    中國足協:舉報足球「假賭黑」 最高獎勵二萬人民幣
    1小時前
  5. 港大5月1日起實施遊客分流措施
    港大5月1日起實施遊客分流措施
    1小時前
  6. 小林製藥社長就紅麴保健品風波致歉 日揆要求徹查真相
    小林製藥社長就紅麴保健品風波致歉 日揆要求徹查真相
    1小時前
  7. 副外長馬朝旭與美副卿坎貝爾通話 促美方停止在涉港問題說三道四
    副外長馬朝旭與美副卿坎貝爾通話 促美方停止在涉港問題說三道四
    1小時前
  8. 台灣民宿老闆不滿政策 赴台北數位發展部大樓開3槍破壞大門
    台灣民宿老闆不滿政策 赴台北數位發展部大樓開3槍破壞大門
    2小時前
  9. 葉劉淑儀批評陳百里「數白欖」、無新措施提升香港優勢
    葉劉淑儀批評陳百里「數白欖」、無新措施提升香港優勢
    2小時前
  10. 中國明天起終止對澳洲進口葡萄酒徵收反傾銷稅和反補貼稅
    中國明天起終止對澳洲進口葡萄酒徵收反傾銷稅和反補貼稅
    2小時前