【Now.com】《職業特工隊》(Mission: Impossible) 系列電影由1996年開始，廿幾年來拍咗七集，男主角湯告魯斯（Tom Cruise）亦跑足咁多集，最新嘅《職業特工隊》第八集將於下年暑期上映。電影公司派拉蒙公開新一集嘅首個預告以及中文片名，名為《職業特工隊：最終清算》（Mission: Impossible – The Final Reckoning），係咪暗示「靚佬湯」係最後一次飾演特工Ethan Hunt？
呢集首個trailer，可以見到《職業特工隊》系列電影過去多個經典片段，出現多個熟悉嘅面孔，好似女主角Grace (希莉艾維飾演)、情報局成員Luther Stickell (文·雷姆斯飾演)、另一個成員Benji Dunn (西蒙柏奇飾演)等。
片中「靚佬湯」繼續上山下海，繼續博晒命跑，片尾有佢同隊友講，「信多我最後一次 (I need you to trust me one last time)」 究竟今次有咩不可能嘅任務挑戰佢哋關係？
新一集《職業特工隊》故事承接上一集，「靚佬湯」帶領一班不可能任務情報局（IMF）隊員繼續對抗失控嘅人工智能，電影將於下年5月23日上映。
