【Now.com】輕盈細細部、戴上身幾乎feel唔到！講緊嘅係DJI最新發表嘅 Mic Mini無線收音咪，支援多種佩戴方式，好似磁吸、夾持等等，單個發射器淨重10克，就算夾喺衫上面都唔會翻出嚟，拍攝出鏡更加靚仔。
DJI Mic Mini 充電盒可以一次過收納兩個發射器、一個接收器、連接頭同防風毛套。收納嘅時候，發射器毛套唔使拆落嚟，可以直接放入盒，煩少好多，轉場拍攝快靚正。
DJI Mic Mini 搭配多種智能功能，操作簡單易上手，可以輕鬆錄製高質聲音。發射器個咪支援全指向無線收音，接收器可以同時連接兩個發射器，同時有主動降噪功能有強弱兩檔選擇，無論室內定係戶外，都可以收錄清晰人聲，減少環境雜音。面對音量太大嘅情況，會自動調低音量，防止爆咪爆聲。
續航力方面，接收器同發射器分別有10.5同11.5小時續航力，加埋叉電盒可以完整叉電3.6次，仲要有快叉功能，叉5分鐘就可以用1個鐘，充飽電都只需90至100分鐘，幫助用家可以盡快開工。而新增嘅自動省電同超時自動關機功能，亦可以有效慳更多電量。
無線咪另一個重要，甚至係必要嘅要求就係訊號穩定，DJI話 Mic Mini 有強勁抗干擾性能，幫助創作者喺複雜環境都可以穩定收音。DJI Mic Mini 支援400米遠距音訊傳輸，即使喺嘈到爆嘅馬路邊或者大型活動現場，收音都穩定清晰。
DJI Mic Mini 無需接收器即可直連 Osmo Action 5 Pro、Action 4 或 Pocket 3，簡化創作流程，提高效率。同時，受惠於 DJI OsmoAudio™ 嘅連接生態，音質將更加純淨，提供原聲級音質體驗。DJI Mic Mini 仲相容多種電子設備，例如相機、手機、電腦同平板。用3.5mm TRS 線連接相機，可以同步開關機；連接手機時仲可以用手機電量充電，或者用藍牙直連手機，隨時開Live直播帶貨都無問題。
DJI Mic Mini（兩發一收，包充電盒） 官方定價1,079港元，包含2個發射器（碳素黑）、接收器、充電盒、4個防風毛套等配件。DJI Mic Mini（一發一收）賣539港元，內含1個發射器（碳素黑）、接收器、發射器充電底座、2個防風毛套。發射器可以單獨購買，DJI Mic Mini 發射器（碳素黑/雲感白）賣329元。
Photo / DJI
