【Now.com】人氣女團COLLAR將於8月28至29日，在亞洲國際博覽館舉行團隊香港第二個大型演唱會《COLLAR “GAME ON” LIVE 2025》，7女正進行地獄式排練。為配合演唱會「GAME ON」主題，COLLAR昨日（14日）推出年度第三首團歌兼演唱會主題曲《Riding High》，MV以科學實驗為主題，代表COLLAR由七種截然不同「元素」混合而成。
睇埋演唱會報道：COLLAR 8月29日亞博演唱會 走鋼線主題海報曝光：以勇往直前決心迎接挑戰
新歌《Riding High》MV以科學實驗為概念，大玩古靈精怪作風。講述COLLA 7女Marf邱彥筒、Gao沈貞巧、Day許軼、Candy王家晴、Winka陳泳伽、Ivy蘇雅琳及Sumling李芯駖各自擁有不同的超能力，包括：瞬間轉移、放大縮小、大力士、大聲公、念力等，象徵組合敢於怪誕創新概念。隊長Gao表示：「其實呢首歌同COLLAR本身都幾脗合，呢幾年我哋嘅歌都冇一個固定風格，同團隊不斷尋求唔同嘅嘗試，睇下將七種截然不同嘅元素撈埋一齊，會出現啲咩可能性，呢方面同做實驗嘅精神不謀而合，可能不按次序出牌就係COLLAR獨有嘅風格。而今次呢首歌亦係我哋演唱會嘅主題曲，演唱會主題係game on，團隊同我哋都希望可以打破舊有嘅框架同模式，同大家一齊打開遊戲大門。」
當中Ivy擁有時間控制的能力：「有一幕講我可以令啲保安停晒喺度，當初聽到呢一幕，我已經非常興奮，因為細個鍾意嘅電影係《變種特工》內裡有個角色叫『快銀』，講佢跑得好快，佢快到其他人幾乎似靜止動作，我對佢呢幕戲印象好深刻，所以好開心今次可以玩呢幕。」至於Candy在MV中擁有瞬間轉移的超能力：「現實我都想擁有自己的超能力—瞬間轉移，咁可以慳車錢，拍嘢無論喺邊度拍都可以收工1秒返到屋企。」而Marf在MV中擁有念力，不過問到她在現實中最想擁有甚麼超能力？她跟Candy不謀而合選擇瞬間轉移，Marf笑言：「可以喺三個鐘頭break入面，去一轉巴黎。」
隨著演唱會進入倒數階段，成員們已積極備戰。阿Day透露：「演唱會已經排練得如火如荼，最地獄式係排舞，每日都排舞，因為我哋每首歌，就算係今次嘅新歌都係跳唱，所以每日都要排，希望帶到更好嘅跳唱演出畀大家睇。」Ivy則指每次演唱會排練期間，都有成員感冒，今次亦不例外。她笑言自己是「倖存者」，希望隊友早日康復。
