【Now.com】一張平平無奇嘅相片，如果喺30年前可能早就喺搬屋時丟棄，但如今成為一張永遠無法再重拍嘅相片，它嘅身價自然直線上升。講緊嘅就係呢張美國蘋果公司創辦人Steve Jobs嘅即影即有相片。
美國拍賣行RR Auction 上星期舉行咗一場以蘋果公司為主題嘅拍賣會，聚焦已故傳奇人物Steve Jobs和蘋果公司喺電腦發展中嘅角色。拍賣品當中，Steve Jobs 喺 1985 年成立 NeXT Software, Inc. 嘅臨時員工證即影即有相片，上面更有 Steve Jobs 嘅簽名。除了Steve Jobs，仲有另外八名 NeXT 創始員工嘅臨時員工證相片，佢哋都係1985年與 Steve Jobs 一齊離開 Apple。為數 9 張 NeXT 開國功臣即影即有相片最終以12,501美元，折合約 97,508港元成交。
話明蘋果公司主題拍賣會，當然唔少得電腦產品相片，三張喺1976年提供畀Byte Shop Paul Terrell嘅Apple-1原型機嘅即影即有照片，啲相係Steve Jobs向Paul Terrell推銷Apple-1嘅介紹內容，最終成功贏得Apple-1嘅首筆、50部「貨到付款」嘅大訂單！若沒有呢筆生意，蘋果可能喺起步階段就已經夭折。
呢三張極稀有嘅即影即有相片，由Paul Terrell本人交給RR Auction，最終以54,904美元成交。
其他拍賣品同樣令果粉和科技迷超興奮，包括一部售價81,251美元嘅Apple Lisa電腦及打印機組合、一張售價66,844美元嘅Steve Jobs 簽名支票，支票日期仲早過蘋果公司正式成立，以及一部售價25,460美元嘅密封8GB iPhone首發機。呢場拍賣總成交金額983,096美元。
Photo / RR Auction
