【Now.com】《全民造星VI》昨晚（16日） 播出一集，14位參賽者到訪韓國娛樂公司了解當地最新行業發展，與此同時，MIRROR成員Anson Lo與其中6位參賽者一同參與當地電視台的節目拍攝，當大家綵排不順利而沮喪時，身為大師兄的Anson Lo即打氣兼教路「追cam」心得，更分享初出道長期處於緊張狀態，自言仍在學習怎樣做到收放自如地表演。
14位參賽者被安排到韓國娛樂公司外，節目組還請來平均年齡只有17歲的韓國女團AtHeart給他們認識。當中Jacky Fan、丘藍和Dave更被選中跟AtHeart學跳舞拍Reels。雖然3人跳舞同樣不在行，但總算努力完成任務。
而當輪到AtHeart學《前傳》舞步時，旁觀的Teller由衷地表示：「好勁呀佢哋，佢用咗15分鐘就練成咗我練咗15日嘅嘢。」負責教AtHeart舞步的Yip也大讚：「佢哋真係跟得好快。」
而早前被選中跟Anson Lo一同參與MBC電視台節目《SHOW CHAMPION》的6位參賽者Bosco Kwan、Ian Hannz、三金、 Dave、 Larry和Gordon亦迎來錄影大日子，不過綵排時大家遇上挫折，身為大師兄的Anson Lo看見大家一臉沮喪，隨即為大家打氣兼教路：「對追cam唔熟呢，以前前輩都係咁同我講，就話咁就唔好追喇，就直接望住前面喇，咁如果個cam take到你嗰下呢，起碼你唔係隻眼喺度思思縮縮，又望左又望右。」
順利完成錄影後，Anson Lo不單止親自炮製部隊鍋慰勞一眾師弟，還分享《造星》參賽心得：「記得《造星I》嘅時候，各大部門嘅製作團隊都成日講話笑多啲啦，咁我哋一齊笑多啲啦，但係跟住都話你哋啲表情都係麻麻地，唔得囉，似dancer囉！似dancer嘅意思唔係唔好呀，只係好似齋跳舞咁，但就冇嗰個舞台魅力同氣場。」
Anson Lo亦坦言出道頭幾年自己都是處於一個好緊張的狀態：「啱啱出道啦，好驚啦所有嘢都，自己好多嘢唔識呀，見住好多唔同嘅前輩好驚呀，仲要諗緊我究竟跳唱我應該可以點樣令到自己似粒星，唔好淨係一個識跳舞嘅人咁簡單。我真係真心覺得自己唔夠好，好差。咁我就睇好多人嘅片囉，我覺得好有用嘅就係唔係模仿人哋嘅台風，係要見到人哋同自己嘅分別係啲乜嘢。呢個就係我頭兩三年每一日做緊嘅嘢。」
Anson Lo自言仍在學習怎樣做到收放自如：「唔係下下你畀到100%就等如你係一粒星，其實係你邊啲位畀多啲，但係又識得放鬆，畀人感覺你唔係下下去盡，你仲有好多空間可以去嘅，即係輕鬆游刃嗰種感覺。」
