【Now.com】《全民造星II》出身、以爆炸頭為標誌的實力唱將曾比特（Mike）今日（7日）迎來32歲生日，同時公布正式加盟英皇娛樂。Mike在社交平台公布消息，更大晒苦練而成的六嚿腹肌相，以全新形象迎接事業新篇章。Mike更透露已向老闆楊受成博士許下特別願望，希望促成二人合作出歌，讓極少開金口的老闆一展歌喉。
曾比特在新造型照中不僅改變標誌性爆炸頭造型，更大晒腹肌。Mike透露每星期做足6日Gym，無論當日工作與否，都風雨不改每次做足兩個鐘，終於練成結實腹肌。網民早前已發現環球唱片官網移除他的資料，加上Mike上月底以新髮型現身楊受成的紅寶石婚晚宴，轉會跡象早有端倪。
英皇娛樂集團營運總裁（Mani）表示：「《造星》時間已經有留意佢，不過一直未有機會合作。我哋睇到佢唔只係一個有才華嘅歌手，更係一個對音樂有堅持、肯不斷突破自己嘅藝人，亦都好欣賞佢對音樂嘅熱誠同埋嗰份純真。」她透露二人因某場合認識成為朋友，一直希望合作，如今終達成心願，相信Mike加盟後將為樂壇帶來更多驚喜。曾比特則形容加盟過程十分自然，雙方在音樂理念上非常合拍。
對於歌迷最關心何時推出新作，Mike坦言：「慢工出細貨！想俾大家見到唔一樣嘅曾比特，所以喺揀歌上面都花咗唔少時間，同A&R都開咗好多會，希望呈現到一個最好嘅效果俾大家。」但他承諾會加快速度，用不同新歌「轟炸」樂迷。至於個人演唱會，他霸氣回應「絕對會」，並笑言已問定老闆楊受成，「老闆應該叫我去啟德唱，希望唔係啟德地鐵站，哈哈。」。
提到公司眾多猛人，最想跟哪一位合作。Mike竟將目標指向老闆：「希望可以同老闆合作出一首歌，因為平時都係聽老闆演講，但係甚少聽佢唱歌，所以我希望今次我入到嚟可以令老闆開金口。」他指終極期望是跟公每一位都合作一次，出碟則是短期目標，想在香港有更多演出機會。Mike強調自己是「Live型歌手」，期待透過現場演出與樂迷近距離接觸，傳遞音樂能量。
