【Now.com】係唔少港人集體回憶嘅平價扒餐連鎖餐廳扒王之王逆市擴張，佢哋喺荃灣沙咀道新店位置貼出告示，宣布11月開門營業。
扒王之王位喺荃灣沙咀道翡翠廣場分店門外貼出告示，高調宣布「我們回來了」，新餐廳將喺11月中開張，再為食客供應扒餐，現正招聘各部門全職及兼職員工，包括樓面主任、部長、侍應、廚師等。
據悉原址舖位一直由扒王之王公司持有，之前租畀宣稱面對港人北上消費、要「反攻深圳」嘅「校長燒肉」，但餐廳未能走出本地飲食業寒冬，已喺9月15日結業，現在扒王之王取回鋪位自用重新開業。
扒王之王1999年成立，係一間以親民價格一嚐鋸扒滋味嘅西式連鎖餐廳，曾經喺香港擁有超過30間分店，但本港經濟變化，市民消費模式轉變，餐廳數目逐漸減少。隨著最後一間沙田分店去年2月結業，餐廳正式全線結業。不過3個月後迅速復活，喺旺角山東街36號華美大廈2樓開店，今次再度擴張喺荃灣開新舖，可呢塊「扒」認真堅韌！
