【Now.com】近年香港的電騙案猖獗，騙徒的手法層出不窮，其中AI「深偽技術」（Deepfake）更是最新的騙案手段之一，連森美（梁志健）都收到！森美昨日（12月29日）在社交平台發文表示，收到「吳君如」的求助訊息，二人更進行視像通話，期間「吳君如」仲聲稱「被導演賣咗去柬埔寨，要借$5000搭船返香港」！
森美在instgram發文，表示自己收到「吳君如」的WhatsApp：「親愛的粉絲，你好嗎？我是吳君如，我知道你一定很驚訝我傳訊息給你。但我有急事找你！」森美見狀便回答：「Hello君如！我係森美呀！」誰知「吳君如」回答：「誰是森美？」二人隨後更展開視訊。
帖文影片中，森美接聽了「吳君如」的視像通話，以半鹹半淡的廣東話夾雜普通話向森美求助：「喂聽唔聽到……聽唔聽到？我係君如，我現在被導演賣咗去柬埔寨，要借＄5000塊，我就搭船返香港呀。」之後森美追問：「乜嘢導演呀？你拍KK園之戀？」「吳君如」未有回應，只表示已發送戶口號碼給森美，然後急急腳收線。
森美在帖文tag了吳君如帳號，留言問：「君如，你喺柬埔寨邊度啊？使唔使搵人嚟救你？」又提醒粉絲們要提防被騙：「依家啲Deepfake都真係幾真，淨係睇樣都真係有機會認錯，除咗口音… 都真係有6、7成似君如㗎！依家真係越嚟越多電話騙案，大家真係要搵啲方法Deepfake詐騙，醒目啲！」
不少網民睇完森美的帖文後爆笑，關心森美是否已救出「吳君如」。193@ERROR就搞笑留言：「快啲救君如姐」。亦有網友嘲deepfake不夠像真：「我仲以為係鄧兆尊」、「有d似DJ Donald（唐劍康）」。亦有網民提醒森美避免在視訊時影到自己，「佢地就係用視像記錄你嘅樣再用AI扮你去呃人架」、「千祈唔好俾佢影你個樣」等等。
PHOTO／Instagram＠sammy903、Instagram＠sandrangky
VIDEO／Instagram＠sammy903
