【Now.com】澳洲收音錄音設備品牌Rode推出全新迷你無線收音咪Wireless Pro，主打支援32-bit 浮點錄音 (Float Recording)，聲音唔會再失真。
有競爭先有進行，Rode 2019年推出Wireless GO，憑藉細小輕巧嘅form factor，加上售價相對便宜，可謂顛覆家用市場，唔少YouTubers都入市，影片拍攝收音質素大幅提升。市埸潛力巨大吸引其他品牌加入競爭，好似來自中國嘅DJI、Comica、Hollyland等都推出相類似產品，而且質優價靚，部分更勝Wireless GO，對Rode構成一定壓力。
這次Rode以Wireless Pro還擊，外型變化唔大，依舊方正設計。內部升級係最大賣點，板載32-bit 浮點錄音，就好似影相用RAW，數碼檔案完整保留聲音資料，收音太大聲可後期慢慢調校，唔再爆音。對於想將聲音錄入相機嘅用家，廠方亦準備咗GainAssist 增益輔助、安全軌等技術方便取得原始音訊。
另一個專業功能係time code同步，用戶透過手機App Rode Central 就可以設定內部時間碼生成器，將影片時間完全同步。Wireless Pro 玩一接兩發嘅「一拖二」收音咪，繼續用2.4GHz 技術傳輸聲音，有效距離達到260米。Wireless Pro又採用了 128 位元加密技術，另外內置 32GB 記憶體和 3.5mm 收音咪插頭，續航力長達 7 小時，咪同接收器可放在充電盒，提供額外 2 次完整充電。
Rode Wireless Pro 套裝定價承惠399美元，約3,130港元，除咗 Wireless Pro「一拖二」組合、充電盒外，仲有一對 Lavalier II 領夾收音咪，唔使另外畀錢買，對消費者係一大喜訊。
資料來源：RODE
