安拿拿責無旁貸。
(©AFP)
【Now Sports】曼聯以3:4不敵拜仁慕尼黑，平咗隊波喺歐聯單場失球紀錄。防線漏水、門將安拿拿又出洋相，點算？
撰文：球十三
單從戰果睇，曼聯作客拜仁慕尼黑輸3:4，好似唔係太差吖，實情係只要有睇場波就知拜仁控制大局，除咗卡斯美路嘅瞓地臥射以至後嚟頂入，兩次帶嚟極短暫高潮，其實冇得踢。曼聯畀太多機會，太容易俾拜仁埋門（19次），若然拜仁球員把握得好啲，又若然唔係兩球中柱，勝負球差更大。
呢次係曼聯自1994年作客吞巴塞隆拿4蛋後，僅有喺歐聯單場失4球。開季至今，隊波踢5場英超失10球（得兩隊失波多過佢哋），計埋今場即係6場失14球，點同強隊兩字沾邊？
安拿拿（Andre Onana）再次成為「主角」，容許一個力度同角度麻麻嘅射門溜入網，成隊信心崩潰，就算佢下半場有過一啲似樣救球，功不抵過。查實佢季前已經蝦碌開壞個頭，近日唔少網民戲謔曼聯仲可以簽迪基亞喎。老實，防線漏水，搵到佢返嚟真係有用？過去迪基亞何嘗唔係俾人話失誤多？學名宿里奧費迪南話齋，成條防線唔夠硬淨，有排捱。
甩轆嘅唔止係安拿拿一個，佢係礙眼啲，但單憑佢一個人搞唔到14球出嚟。
傷兵多？其他球隊何嘗冇呢個問題？冇得賴，慶幸紅魔去到下個月尾打吡戰撼曼城前，暫時唔使再鬥勁旅，坦夏最好把握時機執番好防線，否則嗰張「咪一X樣」嘅合成圖又嚟啦……
撰文：球十三
足球迷叫第十二人，冇偏愛，冷眼旁觀係十三。