皇馬球迷對賓斯馬感激不盡。
(受訪者提供)
【Now Sports】「見證佢貓變獅子嘅過程，亦令到好多球迷由笑佢，到主動買佢波衫。」皇家馬德里香港官方球迷會會長June坦言對賓斯馬離隊感突然，並代表球迷感謝「賓球王」成就基斯坦奴朗拿度，繼而為球隊擔大旗。
「佢早幾日喺《馬卡報》攞傳奇球員獎都澄清唔會離隊，所以今日突然收到呢個消息，就覺得好突然。」June接受sports.now.com訪問時，對賓斯馬（Karim Benzema）盡是感激之言：「首先要多謝佢之前一直支持基斯坦奴朗拿度，如果當年賣佢而留低希古恩，應該唔會成就到之後嘅C朗，作為C朗粉絲真係好多謝佢。佢後尾自己都有講，其實可以對球隊貢獻得更多，為C朗助攻更多。」
「第二個層面係C朗離隊後，佢願意擔大旗，因為當時都冇邊個做到，大家希望阿辛斯奧可以做得到，但其實阿辛斯奧傷咗後都自稱唔能夠擔大旗，所以好多謝賓斯馬。佢有佢嘅優點，當大家曾經鬧佢嘅時候，佢都堅持，而每一個教練都重用佢，可見佢係有個人之處，後嚟證明冇一個睇錯佢，擔大旗之餘亦攞到金球獎。」
June道盡皇馬球迷對賓斯馬的態度轉變：「見證佢貓變獅子嘅過程，亦令到好多球迷由笑佢，到主動買佢波衫。好感謝佢，希望佢之後發展一切順利。」
皇馬顯然正在大換血，為此June續說：「我哋呢幾日冇咗咁多個人，呢個weekend突然冇咗4個球員，估計會長會盡全力追粒星返嚟，因為我哋球場即將開幕。」