【Now Sports】作為一個皇家馬德里球迷,西甲時間偏向美洲市場,所以半夜起身睇波係家常便飯;但十年後嘅我發現,真係好難起身……特別係冬天。最近皇馬變得好多場都踢香港時間凌晨3或4點,呢季開始我已經極少準時起身睇波,好彩依家手提有重播功能。
撰文:June
其實我明白西班牙夏天好熱,特別馬德里係內陸更加熱,要球員踢早場真係好辛苦。隱約記得,以前都仲有香港時間10點或12點場,依家皇馬比賽已經好少見。仲記得,前季真係好夜先開波,連卻奧斯都出post 話「正常我已經瞓咗」。
前幾日見到皇馬喺國際賽周之後4場都係3點,同球迷傾開計發現為咗身體同份工著想,大家都開始忍痛放棄3或4點場,因為睇完波5或6點瞓返又唔係,唔瞓又成日唔冇精神;而我同部份球迷更開始喺起身時熄晒所有手提電話通知,返工途中睇返playback。可能你會覺得冇即時睇咁開心,但唔知賽果嘅情況下,都其實幾緊張。不過有時都會俾人「劇透」,例如歐洲國家盃期間:有次搭車時見到球迷著一件舊英格蘭波衫出嚟......就知唔使睇重播啦,一定係英格蘭贏咗;或者有次唔記得熄Facebook Messager,有朋友會pm 你問,「點解法國會輸……?」所以之後我睇比賽都會熄晒手提所有通知!
講返比賽時間,如果西甲想就美洲市場其實可以考慮10月30號冬令時間後,直接將比賽推到當地10點先開波,即香港時間凌晨5點(加州下午2點),香港睇完差唔多7點,食個早餐再返工就完美。呢個方法仲可以就埋其他同香港同時區嘅地方,計落西甲都有著數。總好過依家打吡咁,一場大戰遷就美洲市場3或4點開波,一場大戰遷就亞洲市場10或11點開波,兩邊都唔討好,連續幾星期都3點,自己球迷都辛苦到想放棄。西甲唔再搞搞佢,真係好難叫其他人睇西甲呢。
撰文:June
旅皇迷一名。喜歡旅行,喜歡足球;享受在場邊搖旗吶喊,經歷足球的喜怒哀樂。
歡迎瀏覽球十三fb專頁若得到波友一個like就是我們團隊的一大鼓舞:
www.facebook.com/ballthirteen