大家賽後拋起費天王。
(©AFP)
【Now Sports】真係短打，諗唔到費達拿告別戰比賽時間都比預期為長，捱眼瞓都抵，而有睇波嘅肯定都會同天王一樣同喜同悲，心情難以平伏，幾眼瞓，都想同大家分享呢種感覺。
撰文：球十三
呢場由費達拿（Roger Federer）夥拍拿度嘅利華盃雙打，既然係天王掛拍戰，當然係有今生冇來世，場波比預期打得耐，贏輸，講真唔係最重要，比賽嘅每個片段都令人難忘，喜歡佢嘅，睇佢打每一球都係享受，亦感到唔捨得……
最意外當然係佢一球抽擊，竟然打中網角個洞，如無意外係佢網球生涯第一次，亦係最後一次咁樣能人所不能。真係叫佢打多千萬次都未必copy到。賽後現場播放為佢特備嘅片段，本來已經喊緊嘅天王一路睇一路喊得更厲害，其他人亦同哭，現場係出自離愁別緒嘅一片愁雲慘霧，好似親人離別咁。
比賽都有笑位，好似見天王同拿度行埋密密斟戰術，分開轉個頭又行番轉頭，好似未傾掂或者唔明白，令現場人士失笑。大家笑，亦因為見到天王好幾次擊落點出色，展現滿意嘅笑容。
好值得回味嘅比賽，最唔捨得，係唔知將來仲有冇球手，可以似費天王咁掀動球迷情緒。
撰文：球十三
足球迷叫第十二人，冇偏愛，冷眼旁觀係十三。