【Now Sports】大家好,我係June,球迷會圈子嘅朋友可能先會認識我。簡單介紹吓自己,我係皇馬香港官方球迷會會長。我由2004年開始留意葡萄牙,2006年世界盃先開始追捧葡萄牙同基斯坦奴朗拿度(仲早過我鍾意皇馬)。Euro 2016,World Cup 2018,Nations League 2019 都有幸現場支持愛隊,兩次仲見證埋捧盃。今屆因為疫情留港,但好開心可以喺Sports.now.com同大家一齊追蹤葡萄牙。
葡萄牙落於死亡F組
作為衛冕球隊,葡萄牙外圍賽失利跌落Pot 3,結果進入死亡F組。F組有2014世界盃冠軍德國、2016 歐國盃冠軍葡萄牙、2018世界盃冠軍法國加匈牙利。出線情況幾嚴峻就唔再多講…...但今年葡萄牙比2016年應該更優秀。
新力軍為C朗而生
睇葡萄牙大家都會留意C朗,畢竟佢係一個偉大嘅球員,剛剛拎咗BBC嘅21世紀最佳歐洲球員,而且今次應該係佢最後一次參加歐國盃,佢自己都話今次比2004年(第一次參賽)更有動力。原因相信同佢由新人變成國家英雄及葡萄牙終於有可以分憂嘅新力軍有關;魯賓迪亞斯(曼城中堅,英超20/21季度最佳球員)、般奴費蘭迪斯(曼聯中場),祖奧菲力斯(馬德里體育會前鋒),迪奧高祖達(利物浦前鋒)呢幾個名,相信大家唔會覺得陌生。當然仲有安達施華同賓拿度施華,前者更喺德甲法蘭克福以28球排喺今季歐洲神射手第4位(C朗以29球排第3)。
葡萄牙青年軍近8年喺世界舞台有唔錯成績,山度士都話呢班男孩子係睇C朗踢波長大,視C朗為偶像去學踢波,相信佢哋可從C朗身上學到毅力同堅持。而佢哋出現真係令葡萄牙整體攻力大大改善,中路多咗變化,減少以前波傳到C朗後,就無法再前進嘅困局。近來無論斬波去前場定撞牆入禁區,終於都有人幫忙,有人形容新力軍簡直係為C朗而生。
熱身賽
近兩場熱身賽見到領隊費蘭度山度士將常用嘅4-3-3變陣成 4-2-3-1,應該係想減輕C朗回防嘅負擔同埋試多一個陣,除咗正前嘅C朗、左翼祖達同中堅比比外,山度士兩場都出完全唔一樣嘅人腳。雖然見到對西班牙嘅熱身賽C朗box to box都只係用咗10秒時間,不過C朗更應該留力做多啲入楔同埋佢最擅長嘅──將機會轉化成入球。
睇番熱身賽場雙牙戰,葡萄牙防守好差但咁啱西班牙前鋒射波好弱,不過嗰場懷疑山度士試陣,佢放兩個年過37歲嘅中堅,比比同方迪。當然佢哋仲好神勇,但兩個一齊都係有少少甩漏少少慢,第2場熱身賽見到山度士加強防守。
匈牙利VS葡萄牙
Fun fact: 匈牙利同葡萄牙喺歐國盃2016年都係同組,佢哋以首名出線(當年葡萄牙小組第3)。不過今次葡萄牙及匈牙利陣容已經同2016年唔同,至少匈牙利無咗「睡褲門將」基拿利。估計葡萄牙可以小勝先取3分。
葡萄牙不能忽視嘅陣容
後防強勁中堅:比比、魯賓迪亞斯
創造力:般奴費蘭廸斯、祖奧菲力斯、簡些路、賓拿度施華
把握力:安達施華、迪奧高祖達
當然,仲有葡萄牙球王C朗
大賽好多時都係講求沉著應戰,等待有機會時攻入一兩球,葡萄牙好多時都可以做到呢點。我相信葡萄牙有能力至少去到4強,但我希望葡萄牙奪冠,成為史上第2隊成功衛冕球隊。
C朗──為紀錄而生嘅男人
最後作為C朗鐵粉,都要偷少少位介紹,C朗可以喺歐國盃決賽周破嘅紀錄:
最多參與屆數:暫時4次(C朗今屆出場變成5次)
最多入球: 暫時8球,與柏天尼一樣
最多出場次數:C朗56次,少保方兩次
歷史上最多國際賽入球:109球(暫時104球)
之後呢個比較難:
決賽最大年齡入球者:30歲103日,C朗將會係36歲156日(7月11日),但注意,上次2016年決賽C朗冇入球。
好啦,一口氣介紹咗一堆睇葡萄牙嘅重點,希望大家對呢隊常常被稱為黑馬嘅球隊有個少少回憶。葡萄牙第1場完咗之後再同大家講波。
撰文:June
【歐國盃F組】匈牙利VS葡萄牙
Now TV 618台16/06 00:00直播
Now TV 616台4K直播
Now E 同步直播