唔好睇死我！
(©AFP)
【Now Sports】做人太過一帆風順，未必係好事，荷蘭在分組賽首場對烏克蘭，險過剃頭拿到3分，旗開得勝，口痕友終於無話可說！
精采萬分嘅荷烏之戰，荷蘭憑雲拿當和韋賀斯先入兩球，烏克蘭鍥而不捨，追成平手，完場前右閘鄧費斯（Denzel Dumfries）絕殺險勝3:2。橙衣兵團擺出5-3-2陣式，也是已故荷蘭球王告魯夫最不屑嘅衛翼陣式，但時易世移，球星大減，有時都是逼不得己。作為燕豪芬隊長，鄧費斯八面玲瓏，搶盡風頭，頭兩球都有功勞，完場終極一「頭」，當選比賽最佳球員，實至名歸。
身高1.89嘅鄧費斯攻守有效率，今季有6次助攻，射入2球，今年先25歲，仲有大把進步空間，身價1500萬歐元，難怪盛傳拜仁慕尼黑有意出手。
呢隊荷蘭劫難一個接一個，卻令人愈難愈愛，雲拿當入波後參考雲迪克嘅慶祝方式，向隊長致敬；戴利白連特自爆見到艾歷臣休克一幕，差啲申請唔踢首場；38歲史迪基倫保自2016年後未嘗代表國家隊，臨危受命交到貨。
法蘭迪保亞在國際米蘭上任85日被炒，接手水晶宮77日被炒，慘被摩連奴嘲諷為「英超史上最差」，更預言橙衣兵團最多入到8強。荷蘭人性格自我，歷屆大戰屢爆內亂，法蘭迪保亞深知DNA係改變唔到：「過往我們有天才，但隊友唔夠老友，結果成績慘不忍睹，今屆我希望大家放下自我，一齊組隊『朋友號』出發！」
撰文：八十後鬱金香
鍾意食橙，喜歡橙色，命中註定