【Now Sports】冇雲迪克,又使乜驚呀?我哋係鳳凰不死鳥,壞咗嘅人迪比一樣可以變好,一對中堅唔係差到無朋友,仲有埋主場之利,真係不必睇得太淡。荷蘭人有句諺語「Doe maar normaal dan doe je al gek genoeg(當你正常就已經夠瘋狂)」,正常與瘋狂只在一念之間。
唔講唔覺,荷蘭自2014年世界盃獲得季軍後,闊別大賽7年之久,奈何今屆歐國盃,出師未捷身先死,雲迪克同雲迪比受傷缺席,朗奴高文「叛國」過檔巴塞隆拿......一大籮不利消息接踵而來,導致全世界都唔睇好,甚至係告魯夫橫空降世之後,最被忽視嘅橙衣兵團。
今日荷蘭,星味大減,勝在離開曼聯後浴火重生嘅迪比(Memphis Depay)信得過,上季為里昂貢獻「雙雙」的22球和12次助攻,近7場為國披甲也有7球和3次助攻,真係可以自豪講句:「知我乜料啦!」查實,柱躉式中鋒韋賀斯夠搏命、有身位,可為拍檔迪比撞散防線,開山劈石。
中場方面,法基迪莊穿上橙衫後,表現往往比巴塞出色,雲拿當入「門」沖喜,外圍賽有8球進賬,大家唔使太擔心;防線上的迪菲係上季最佳意甲後衛,迪列治今季在祖記總算平穩,一人走多步,未必比雲迪克在陣時差很遠。
踢波如做人,最重要係上善若水,有幾多米落幾多水,人人狂插法蘭迪保亞捨棄荷蘭人見慣嘅4-3-3,改踢被動嘅5-3-2,未嘗唔係好事。歐國盃從來不是最強者勝,1992年丹麥、2004年希臘到2016年葡萄牙,邊個敢話佢哋係當屆最強?
咦,咁大件事冇人講?雲迪克會在決賽周加入教練團負責打氣,傳授防守秘笈,我哋一樣見到佢嘅英姿,唔落場一樣有貢獻。所以話,今屆無人對荷蘭有期望,話唔定會帶來新希望。
因為米高斯同告魯夫改變世界,因為雲巴士頓嘅世紀金球,因為荷蘭三劍俠橫掃歐洲,我愛上了荷蘭,迪比儼如延續了幾十年來橙衣壞孩子嘅傳統色彩,當你正常就已經夠瘋狂。
撰文:八十後鬱金香
鍾意食橙,喜歡橙色,命中註定
【歐國盃C組】荷蘭VS烏克蘭
Now TV 618台14/06 03:00直播
Now TV 616台4K直播
Now E 同步直播