【Now Sports】開波!今屆歐洲國家盃首個賽日先嚟單頭意大利對土耳其,有藍軍睇其實唔錯,喺一屆世界盃「失蹤」後有新鮮感嘛!尤其喺文仙尼麾下,隊波進攻同防守好平衡,仲講咩上世紀十字聯防、最強防守、穩守突擊呢啲名詞, 因住out晒。
撰文:球十三
可能係知恥近乎勇,意大利係今屆賽事外圍賽其一長勝師,而近年喺世界盃外圍賽同熱身賽嘅表現話畀大家知,隊波好重視進攻。呢個當然同前鋒出身嘅文仙尼有關,佢同以前嘅索夫(門將)、干地(中場)唔同,流住嘅係進攻嘅血液。嚟到大賽,即管睇張支票會唔會兌現,定係講到尾又先求穩陣。
Netflix嘅《Baggio: The Divine Ponytail》(巴治奧:神奇小馬尾)勾起好多人對呢位巨星嘅回憶,好多遺憾,查實文仙尼何嘗唔係?巴治奧起碼喺國際舞台威過,文仙尼就喺意大利猛將如雲嘅年代,踢國家隊唔夠40次,以為90年世界盃拍住維埃里踢正選,點知紅嘅係最終鑼金靴獎嘅史基拉斯,同埋火速上位嘅巴治奧。
如今佢有機會以另一個身份喺國際舞台顯威風,佢經常重申會踢進攻足球,意大利前線冇巨星,亦冇好似巴洛迪利呢類搶鏡壞孩子,反而畀人實而不華感覺。
亦想講講土耳其,隊波由名牌教練觀尼斯帶領下大翻身,射手尤馬斯當然火紅,亦延續隊波愛上腳嘅傳統。呢啲球隊從來係二線,但唔能夠忽視,意大利歷來慣性大賽慢熱,稍一不慎隨時第一場就爆冷。
揭幕戰,變數大。
直播場次
【歐國盃A組】土耳其VS意大利
Now TV 618台12/06 03:00直播
Now TV 616台4K直播
Now E 同步直播
撰文:球十三
足球迷叫第十二人,冇偏愛,冷眼旁觀係十三。
email:ballthirteen@hotmail.com
歡迎瀏覽球十三fb專頁,若得到波友一個like,就是我們團隊的一大鼓舞:
www.facebook.com/ballthirteen