【Now Sport】呢個星期皇家馬德里上下都好忙, 先有施丹離開後再喺發公開信,解釋離開係因為覺得管理層已畀唔到佢需要嘅支持,而且多次於比賽失利後放出消息話:「下場再輸,皇馬就要炒教練」,令施丹非常傷心。最後皇馬喺星期三凌晨官方宣佈安察洛堤回歸,佢自己更喺社交媒體直言「願意接受呢個新挑戰,因為皇馬一直喺我心入面」。
撰文:步大力熊
呢個消息令皇迷好驚喜,因為一來傳緊係干地或魯爾,二來安察洛堤仲教緊英超嘅愛華頓,最後皇馬選安帥可能係因為策略上嘅考慮。有傳干地會去皇馬教,但可惜佢向皇馬提出嘅買人同策略或比施丹更激(佢亦係因為咁同國際米蘭高層出咗分歧);如果皇馬可以答應干地嘅要求,不如一早答應施丹好過。所以皇馬就放棄干地。
星期二,就傳出皇馬要叫返安察洛堤返嚟教。西班牙國家電視台記者指,其實係因為安察洛堤打去皇馬想買一個人,結果俾皇馬說服佢返去執教。
安察洛堤返皇馬,真係配合晒天時地利人和。施丹走咗,其實都無咩領隊敢嚟教,睇之前盧柏迪古同蘇拿利嘅下場就知。CV無返咁上下,都幾難鎮住班高層同球員。
所以安塞洛堤呢個第10個歐聯冠軍教練,可能係一個合適人選。佢係除咗施丹之外,現役拎過3次歐冠嘅教練,而佢領軍時,施丹係佢助教,佢又帶領過皇馬拎過西班牙國王盃(佢之後,皇馬就無再拎過呢個盃)。
施丹話佢有一班好好嘅球員,名帥雲加都有講過,班球員次次都可以救到施丹,令施丹可以教到季尾。唔知安察洛堤有冇可能用得掂佢哋?
安察洛堤喺記者會時就話,球隊依家有好多人,所以再買人之前要分析下先,亦可能需要減少一啲球員。佢都有提起大家好關注嘅加利夫巴爾,因為早前有傳佢想叫巴爾去愛華頓(可能就係佢打電話去皇馬嘅原因)。佢指自己好鍾意巴爾、馬些路同伊斯高,但佢哋要證明自己仲想踢皇馬。佢仲會加強進攻體系,無論前場定中場,佢仲話雲尼素斯要入更多波。
安察洛堤出名識睇餸食飯,所以就算皇馬唔買人,或只買安巴比一個人,相信佢都有辦法搞得掂,踢到啲成績。呢個時勢,各球會都冇錢嘅時侯,施丹又二度出走,相信眼前得安察洛堤呢類教練,符合依家想慳錢又想成績好嘅皇馬。
撰文:步大力熊
要做一個理性球迷?不了,成為球迷本身就是一件不理性而且瘋狂的事。
email:ballthirteen@hotmail.com
歡迎瀏覽球十三fb專頁若得到波友一個like就是我們團隊的一大鼓舞:
www.facebook.com/ballthirteen